Fana: At a Speed of Life!

የኢህአዴግ ምክር ቤት የፖርቲውን ውህደት አፀደቀ

አዲስ አበባ፣ ህዳር 11፣ 2012 (ኤፍ.ቢ.ሲ) የኢትዮጵያ ህዝቦች አብዮታዊ ዴሞክራሲያዊ ግንባር (ኢህአዴግ) ምክር ቤት የድርጅቱ ስራ አስፈፃሚ ኮሚቴ የመራለትን የፖርቲውን ውህደት አፀደቀ።

የኢትዮጵያ ህዝቦች አብዮታዊ ዴሞክራሲያዊ ግንባር (ኢህአዴግ) ምክር ቤት በዛሬው እለት ማካሄድ በጀመረው ስብሰባ ነው ውህደቱን ያፀደቀው።

የኢህአዴግ ስራ አስፈፃሚ ኮሚቴ አባል አቶ ፍቃዱ ተሰማ ጉዳዩን አስመልክተው ከኢቢሲ ጋር ባደረጉት ቆይታ፥ምክር ቤቱ የግንባሩን ውህደት አስመልክቶ በዝርዝር ከመከረ በኋላ በሙሉ ድምፅ ማፅደቁን ተናግረዋል።

በተጨማሪም ምክር ቤቱ በፓርቲው ፕሮግራም ላይ ተወያይቱ ማጽደቁንም አቶ ፍቃዱ አስታውቅዋል።

የኢህአዴግ ስራ አስፈፃሚ ኮሚቴ አባል አቶ ፍቃዱ ተሰማ፥ በስብሰባው የኢህአዴግ ኦዲትና ቁጥጥር ኮሚሽን የውህደቱን አስፈላጊነትና ህጋዊ አሰራር እንዲሁም ከደንብ ጋር የተገናኙ ጉዳዮችን በዝርዝር ጥናት ማቅረቡን ተናግረዋል።

በጥናቱ ውጤት መሰረትም ኢህአዴግ አሁን ባለው ነባራዊ ሁኔታ ሀገራዊ ለውጡን ለማስቀጠል እንዲሁም የህዝቦችን ሁለንተናዊ ብልፅግና ለማረጋገጥ የግንባሩ ውህደት አስፈላጊ መሆኑ ተረጋግጧል።

ውህደቱ ህገ ደንብና ስርዓቱን ተከትሎ ከመከናወኑ አንፃርም ትክክል ስለመሆኑ በጥናቱ ተመላክቷል ነው ያሉት አቶ ፈቃዱ።

ከዚህ ባለፈም ምክር ቤቱ በዛሬው ውሎው በአዲሱ ውህድ ፓርቲ (ብልፅግና ፓርቲ)ፕሮግራም ዙሪያ መምከሩንና ማፅደቁንም ተናግረዋል።

በዚህም በፓርቲው ፖለቲካዊ፣ ኢኮኖሚያዊእና ማህበራዊ ጉዳዮች እንዲሁም በውጭ ጉዳይ ግንኙ ነት ፖሊሲ ዙሪያ ዝርዝር ውይይት ተካሂዷል ነው ያሉት።

ምክር ቤቱ በነገው ዕለት በሚያካሂደው ስብሰባም በተዘጋጀው የብልፅግና ፓርቲ መተዳደሪያ ህገ ደንብ ረቂቅ ዙሪያ የሚመክር መሆኑን ጠቁመዋል።

በሌላ በኩል ምክር ቤቱ በዛሬው ዕለት ያካሄደው ውይይት ዴሞክራሲያዊ ፣ግልፅ ፣አሳታፊ እና ሃላፊነት የተሞላበት እንደነበር ተናግረዋል።

You might also like
Comments
Loading...