Fana: At a Speed of Life!

የአፍሪካ ቀንድ ሀገራት የቀጠናውን ሰላም፣ ደህንነትና ኢኮኖሚያዊ ትስስር ለማስቀጠል ሊሰሩ እንደሚገባ ተገለፀ

አዲስ አባበ፣ ህዳር 2፣ 2012 (ኤፍ.ቢ.ሲ) የአፍሪካ ቀንድ አገራት የቀጠናውን ሰላም፣ ደህንነትና ኢኮኖሚያዊ ትስስርን ለማስቀጠል በሚያስችሉ ጉዳዮች ዙሪያ በስፋት ሊሠሩ እንደሚገባ ተገለፀ።

የኢፌዴሪ የህዝብ ተወካዮች ምክር ቤት አፈ ጉባዔ አቶ ታገሰ ጫፎ በሶማሊያ ፓርላማ አፈ ጉባዔ መሐመድ ሙርሳል የተመራውን የልዑካን ቡድን በጽህፈት ቤታቸው ተቀብለው አነጋግረዋል፡፡

በቆይታቸውም አፈ ጉባዔ ታገሠ ጫፎ፥ ሶማሊያ ከኢትዮጵያ ጋር ያላት ግንኙነት ጉርብትና ብቻ ሳይሆን እንደ ወንድማማች ህዝብ ጭምር መሆኑን አንስተው፤ በሶማሊያ ፓርላማ አፈ ጉባዔ የተመራው ልዑካን ቡድን ወደ ኢትዮጵያ ፓርላማ መምጣቱ የሁለቱን አገራት ግንኙነት ወደ ተሻለ ደረጃ ከፍ ያደርገዋል ብለዋል።

አፈ ጉባዔ አቶ ታገሰ አክለውም፥ የልኡካን ቡድኑ ወደ ኢትዮጵያ መምጣት የቀጠናውን ሀገራት ሰላም የበለጠ ለማስጠበቅ የሚያግዙ ስራዎችን ለመስራት ትልቅ ፋይዳ እንዳለው አብራርተዋል።

የምስራቅ አፍሪካ ሀገራት ያላቸውን የጋራ ጥቅሞች ቅድሚያ በመስጠት መጠበቅና ማስከበር እንደሚገባቸው የጠቆሙት አቶ ታገሰ፥ ኢትዮጵያም በፖለቲካ፣ በኢኮኖሚ እንዲሁም በሌሎች ጉዳዮች ያላትን ልምድ ለሶማሊያ ለማካፈል ፈቃደኛ መሆኗን አረጋግጠዋል።

የሶማሊያ ፓርላማ አፈ ጉባዔ መሐመድ ሙርሳል በበኩላቸው፥ የኢትዮጵያ መንግስት ከዚህ በፊት በሰላም፣ በሰብዓዊ መብት አያያዝ እና መሰል ጉዳዮች ድጋፍ ሲያደርግ መቆየቱን ገልፀዋል።

አክለውም በኢትዮጵያ በኩል የአልሻባብ ሃይልን ለመግታት በሰላም ማስከበር ረገድ እየተደረገ ያለው ድጋፍ ተጠናክሮ እንዲቀጥል እና በሶማሊያ በ2021 በሚደረገው ምርጫ የፓርላማውን አቅም ለማጎልበት ድጋፍ እንደሚፈልጉም ገልጸዋል።

መሐመድ ሙርሳል፥ በሶማሊያ ፓርላማ ከ275 መቀመጫ 30 በመቶ ሴቶች መሆናቸውን ጠቁመው፤ በቀጣይ በፓርላማው የሴቶችን ተሳትፎ ለማሳደግ መስራት እንደሚገባና ለአሰራር ማነቆ የሆኑ ሊሻሻሉ የሚገባቸው የህገ መንግስት ክፍሎች እንዳሉ መጠቆማቸውን ከፓርላማ ጽህፈት ቤት ያገኘነው መረጃ ያመለክታል።

You might also like
Comments
Loading...