Fana: At a Speed of Life!

የተንታ መገንጠያ- ወገል ጤና- ኩርባ መንገድ ግንባታ በይፋ ተጀመረ

አዲስ አበባ፣ ህዳር 20፣ 2012 (ኤፍ.ቢ.ሲ) በአማራ ክልል ከ1 ነጥብ 8 ቢሊየን ብር በላይ በሆነ ወጪ የሚከናወነው የተንታ መገንጠያ- ወገልጤና – ኩርባ መንገድ ግንባታ በይፋ ተጀመረ።

ፕሮጀክቱ የአማራ ክልል ርዕሰ መስተዳደር አቶ ተመሰገን ጥሩነህ፣ የትራንስፖርት ሚኒስተር ወይዘሮ ዳግማዊት ሞገስ እና የኢትዮጵያ መንገዶች ባለስልጣን ዋና ዳይሬክተር ኢንጂነር ሃብታሙ ተገኘን ጨምሮ የፌደራልና ክልል ባለሥልጣናት በተገኙበት በይፋ ተጀምሯል።

የተንታ – ወገልጤና – ኩርባ መገንጠያ መንገድ 79 ነጥብ 24 ኪሎ ሜትር ርዝመት ያለው ሲሆን፥ በከተማ 19 ሜትር እና በገጠር 10 ሜትር ስፋት ያለው መሆኑ ተገልጿል።

በአስፋልት ኮንከሪት ደረጃ የሚገነባው መንገዱ 1 ቢሊየን 873 ሚሊዮን 489 ሺህ 476 ወጪ እንደሚከናወን እና የግንባታው ወጪ በኢትዮጵያ መንግስት የሚሸፈን መሆኑም ታውቋል።

የመንገዱ ግንባታም 3 ዓመት ጊዜ ውስጥ ተጠናቆ አለገልግሎት ክፍት እንደሚደረግም ነው የተገለፀው።

መንገዱ ተገንብቶ ሲጠናቀቅ የሰሜንና የደቡብ ወሎ ዞኖችን ከማስተሳስሩ ባሻገር የደሴ ከተማን ከኩታበር፣ ከወገልጤና፣ ከተንታ እና ኩርባ ከተማ ጋር በአቋራጭ የሚያገናኝ ነው ተብሏል።

ከዚህ በፊት በአካባቢው የነበረውን የትራንስፖርት ችግር በመቅረፍ ህብረተሰቡ በተመጣጣኝ ዋጋ ወደ ፈለገው ቦታ የሚንቀሳቀስበትን ሁኔታ የሚያመቻች መሆኑንም ከኢትዮጵያ መንገዶች ባለስልጣን ያገኘነው መረጃ ያመለክታል።

የዚህ መንገድ ቀጣይ ክፍል የሆነውን የኩርባ መገንጠያ – ጨጎማ – ጋሻና የመንገድ ግንባታ ፕሮጀክት ለማስጀመር በጨረታ ሂደት ላይ እንደሚገኝም ባለስልጣኑ አስታውቋል።

You might also like
Comments
Loading...