Fana: At a Speed of Life!

የቦይንግ የቀድሞ ሰራተኛ የ787 አውሮፕላን የኦክስጅን መስጫ ችግር እንዳለበት አጋለጠ

አዲስ አበባ ፣ ጥቅምት 26 ፣ 2012 (ኤፍ ቢ ሲ) ቦይንግ 787 ድሪምላይነር አውሮፕላን በጉዞ ላይ አደጋ ቢከሰት መንገደኞች ለኦክስጅን እጥረት ሊጋለጡ እንደሚችሉ የኩባንያው የቀድሞ ሰራተኛ ተናገረ።

ጆን ባርኔት የተሰኘው የቦይንግ የቀድሞ ሰራተኛ እንደገለጸው፥ 787 ድሪምላይነር አውሮፕላን በጉዞ ላይ እክል ቢገጥመው መንገደኞች ኦክስጅን ላያገኙ ይችላሉ።

ለዚህ ደግሞ ለአደጋ ጊዜ በ787 ድሪምላይነር አውሮፕላኖች ውስጥ ከተገጠሙትና ኦክስጅን ከሚያሰራጩት መሳሪያዎች ውስጥ ¼ የሚሆኑት ችግር ያለባቸው አልያም የማይሰሩ ሊሆኑ ይችላሉም ነው ያለው።

ይህን መሳሪያ በሚያመርተው የኩባንያው ፋብሪካ ውስጥም ሆን ተብሎ የማይሰሩ ኦክስጅን ማሰራጫ መሳሪያዎች ለአውሮፕላኖቹ መገጠማቸውን አጋልጧል።

ቦይንግ በበኩሉ በቀድሞ ሰራተኛው የቀረበበትን ውንጀላ አጣጥሏል።

ኩባንያው አውሮፕላኖቹ በጥራት እንደተሰሩ በመጥቀስም፥ የደህንነት ደረጃቸው አስተማማኝ መሆኑንም ገልጿል።

ባርኔት በኩባንያው ውስጥ ለ32 አመታት የጥራት ቁጥጥር ኢንጂነር በመሆን ያገለገለ ሲሆን፥ በጤና እክል ምክንያት ከኩባንያው የዛሬ ሁለት አመት ለቋል።

ከፈረንጆቹ 2010 ጀምሮም በኩባንያው የካሮሊና የአውሮፕላን እቃዎች ማምረቻ ፋብሪካ ውስጥ የጥራት ክፍል ሃላፊ በመሆንም አገልግሏል።

 

 

ምንጭ፦ ቢቢሲ

 

You might also like
Comments
Loading...