Fana: At a Speed of Life!

የቦሊቪያ ፕሬዚዳንት ኢቮ ሞራሌስ ሜክሲኮ ያቀረበችላቸውን ጥገኝነት ተቀበሉ

አዲስ አባበ፣ ህዳር 2፣ 2012 (ኤፍ ቢ ሲ) በተቀሰቀሰባቸው ተቃውሞ ምክንያት ስልጣናቸውን የለቀቁት የቦሊቪያው ፕሬዚዳንት ኢቮ ሞራሌስ ሜክሲኮ ያቀረበችላቸውን የፖለቲካ ጥገኝነት በመቀበል ሀገራቸውን ለቀው ወጥተዋል።

ላለፉት14 ዓመታት ሀገሪቱን ያስተዳደሩት ኢቮ ሞራሌስ ባሳለፍነው ወር በተካሄደው ፕሬዚዳንታዊ ምርጫ ዳግም መመረጣቸውን ተከትሎ በተቀሰቀሰባቸው ተቃውሞ ምክንያት ስልጣናቸውን ለመልቀቅ ተገደዋል።

ይህንን ተከትሎም ሜክሲኮ ፕሬዚዳንት ኢቮ ሞራሌስ ፍላጎታቸው ከሆነ የፖለቲካ ጥገኝነት ለመስጠት ፈቃደኛ መሆኗን በትናንትናው ዕለት አስታውቃለች።

ፕሬዚዳንት ኢቮ ሞራሌስም ሜክሲኮ ያቀረበችለትን የፖለቲካ ጥገኝነት በመቀበል ሀገራቸውን ለቀው ወደ ስፍራው ማቅናታቸውን ይፋ አድርገዋል።

ኢቮ ሞራሌስ ጉዳዩን አስመልክተው በትዊተር ገፃቸው ባስተላለፉት መልዕክት፥ “ቦሊቪያን ትቼ በሴራ ፖለቲካ መሰደዴ ልቤን ቢሰብረውም፤ሀገሬን ለማገልገል በአዲስ ሃይልና መንፈስ ተጠናክሬ የምመለስ መሆኑን ማሳወቅ እፈልጋለሁ” ብለዋል።

በሌላ በኩል ደጋፊዎቻቸው በሴራ ፖለቲካ  ስልጣናቸውን እንዲለቁ እና ሀገራቸውን ትተው እንዲሰደዱ ባደረጉ ሃይሎች ላይ የሚያሰሙትን ተቃውሞ አጠናክረው እንዲቀጥሉ አሳስበዋል።

የሜክሲኮ የውጭ ጉዳይ ሚኒስትር ማርሴሎ ኤብራርድ ፕሬዚዳንት ኢቮ ሞራሌስ በሀገራቸው መንግስት አውሮፕላን ተሳፍረው ወደ ሜክሲኮ ማቅናታቸውን አረጋግጠዋል።

ኢቮ ሞራሌስ  ወደ ሜክሲኮ መሰደዳቸውን ተከትሎም  የሀገሪቱ ምክር ቤት ምክትል ሃላፊ ምርጫ እስከ ሚካሄድ ድረስ የሽግግር ፕሬዚዳንት በመሆን ስልጣኑን ትረከባለች ተብሏል፡፡

ምንጭ፦ቢቢሲ

You might also like
Comments
Loading...