Fana: At a Speed of Life!

የብሄራዊ የሳይበር ደህንነት ግንዛቤ ማስጨበጫ ሳምንት በይፋ ተጀመረ

አዲስ አበባ፣ ጥቅምት 24፣ 2012 (ኤፍ.ቢ.ሲ) በኢንፎርሜሽን መረብ ደህንነት ኤጀንሲ የተዘጋጀው የመጀመሪያው ብሄራዊ የሳይበር ደህንነት የግንዛቤ ማስጨበጫ ሳምንት በይፋ ተጀምሯል።

ግንዛቤ ማስጨበጫ ሳምንቱ “ትኩረት ለሳይበር ደህንነት” በሚል መሪ ቃል ነው በአፍሪካ ኢኮኖሚ ኮሚሽን የስብሰባ አዳራሽ በዛሬው እለት በይፋ የተጀመረው።

የኢንፎርሜሽን መረብ ደህንት ኤጀንሲ ዋና ዳይሬክተር ወይዘሮ ኤፍራህ አሊ በመክፈቻ ስነ-ስርዓቱ ላይ ባስተላለፉት መልዕክት፥ የሳይበር ደህንነት ግንዛቤ ማስጨበጫ ሳምንትን የማክበር ዓላማ በዘርፉ ያለው ንቃተ-ህሊና ለማሳደግ ያለመ መሆኑን ገልፀዋል።

በሀገሪቱ ከዓመት ዓመት እየደረሱ ያሉት የሳይበር ጥቃቶች እየጨመሩ መምጣታቸውን የገለጹት ዋና ዳይሬክተሯ፥ ሁሉም የህብረተሰብ ክፍል ከምንግዜውም በበለጠ ለሳይበር ደህንነት ትኩረት ሊሰጥ ይገባል ነው ያሉት።

የሰላም ሚንስቴር ሚኒስትር ዴኤታ አቶ ዘይኑ ጀማል በበኩላቸው ፥ እየተከበረ ሚገኘው የሳይበር ደህንነት ሳምንት ወቅቱን የጠበቀ እና የማህበረሰቡን ግንዛቤ ለማሳደግ አጋዥ መሆኑን አብራርተዋል።

ዓለም በሳይበር ምህዳር አንድ መንደር በሆነችበት በዚህ ዘመን የሳይበር ሃይል ከገንዘብ፣ ከጦር መሳሪያ እና መሰል አቅሞች በላይ የሆነ የዘመናችን ቁልፍ መወዳደሪያ አቅም መሆኑንም አውስተዋል።

የሳይበር ደህንነት ለኢትዮጵያ አዲስ እና በርካታ የሰለጠነ የሰው ሃይል የሚፈልግ መሆኑን ያነሱት አቶ ዘይኑ፥ በዘርፉ የተሰማራውን የሰው ሃይል አቅም በመገንባት እና አዲስ የሰው ሃይል በማልማት አስፈላጊውን የቴክኖሎጂ ግብዓት ማሟላት አስፈላጊ መሆኑን ተናግረዋል።

ይህም በሀሪቱ ላይ ሊቃጣ የሚችልን ማናቸውም ጥቃት በራስ አቅም ለመመከት የሚያስችል መሆኑን ነው የገለጹት።

መንግስትም ዘርፉን ለማሳደግ አስፈላጊውን ሁሉ እገዛ የሚያደርግ መሆኑን ሚኒስትር ዴታው ማስታወቃቸውን ከኢንፎርሜሽን መረብ ደህንነት ኤጀንሲ ያገኘነው መረጃ ያመለክታል።

የህረተሰቡን አስተሳሰብ በመቀየር ረገድ የመሪነት ሚናን የሚጫወቱት የመገናኛ ብዙሃን ናቸው ያሉት ሚኒስትር ዴኤታው፥ የሳይበር ደህንነት ጉዳይ የሁሉም ሃላፊነት መሆኑን በመረዳት የፕሮግራሞቻቸው አንድ አካል አድርገው በመቅረጽ ሊሰሩ እንደሚገባም አሳስበዋል

You might also like
Comments
Loading...