Fana: At a Speed of Life!

የቤጉህዴፓ ስራ አስፈጸሚ ኮሚቴ የተለያዩ ውሳኔዎችን በማሳለፍ ስብሰባውን አጠናናቀቀ

አዲስ አበባ፣ ጥቅምት 28፣2012 (ኤፍ ቢ ሲ) የቤኒሻንጉል ጉሙዝ ህዝቦች ዴሞክራሲያዊ ፓርቲ (ቤጉህዴፓ) ስራ አስፈጸሚ ኮሚቴ የተለያዩ ውሳኔዎችን በማሳለፍ ስብሰባውን አጠናቋል፡፡

ስራ አሰፈጸሚ ኮሚቴው የ2012 ዓ.ም የ1ኛ ሩብ አመት የውስጠ ድርጅትና የመንግስት አፈጻጸምን በመገምገም እና ወቅታዊ ሀገራዊና ክልላዊ የፖለቲካና የጸጥታ ሁኔታዎች ላይ ተወያይቶ የመፍትሄ አቅጣጫ አስቀምጧል፡፡

በዚህም በ2011 ዓ.ም አፈፃፀም ላይ የታዩ ጠንካራ እና ደካማ ጎኖቸን በመለየት ጠንካራ ጎኖች ይበልጥ ተጠናክረው የሚቀጥሉበት እና ደካማ ጎኖች ደግሞ በፍጥነት እንዲታረሙ ውሳኔ አሳልፏል፡፡

በሀገሪቱ እየተካሄደ ካለው የለውጥ ሂደት አንጻር መዋቅራዊ ሁኔታ ላይ ትኩረት በመስጠት የዉስጠ ድርጅትና የመንግስት ስራዎች የተፈፀሙበት አግባብ እና ግምገማን መሰረት አድርጎ የተፈጠረው አደረጃጀት የመፈፀምና የማስፈፀም አቅም ከሌላዉ ጊዜ በተሻለ ጥሩ እንደሆነም ገምግሟል።

ሌላው ሀገራዊ ለውጡን ለማሳለጥና የክልሉን ሕዝብ ይበልጥ ተጠቃሚ ለማድረግ በርካታ የንቅናቄ መድረኮችን በመፍጠር ሠፊ የሕዝብ ግንኙነት ሥራዎች መሰራታቸውን በጥንካሬ ገምግሟል፡፡

ሆኖም የኪራይ ሰብሳቢነት አመለካከትና ተግባራትን በቁርጠኝነት ያለመታገል፣ የከተማና የገጠር መሬት አስተዳደር አጠቃቀም ስርዓት ያለማስያዝ፣ የድጋፍ አሰጣጥ ስራዎች በሚፈለገዉ ደረጃ ችግር ፈቺ ያለመሆን፣ ቅንጅታዊ አሰራር ላይ ውስንነት መኖሩ፣ የህዝብ ተሳትፎ ስራዎችን በሚፈለገው ደረጃ አለማድረስ እና ጎጂ ልማዳዊ ድርጊቶችን ሙሉ በሙሉ ከመቅረፍ አንጻር ውስንነቶች መኖራቸውን ሥራ አስፈጻሚ ኮሚቴው መገምገሙ ነው የተነገረው፡፡

ከመዋቅራዊ ሁኔታ ግምገማ በኋላም የበጀት ዓመቱን የውስጠ ድርጅትና የመንግስት አፈፃፀሞች በጥልቀት የገመገመው ሥራ አስፈጻሚ ኮሚቴው ካለፈው በጀት ዓመት ጀምሮ በክልሉ በተለያዩ አካባቢዎች የተከሰተውን የፀጥታ ችግር ለማረጋጋትና ወደ ነበረበት ሁኔታ ለመመለስ ሰፊ ርብርብ ከማድረግ ባሻገር የልማቱም ስራ ከጸጥታ ስራው ጎን ለጎን እንዲፈጸም መደረጉ መልካም መሆኑንና ውስንነቶች መኖራቸውንም ተመልክቷል፡፡

የውስጠ ድርጅት ስራዎችን በማጠናከር ሌሎች ቁልፍ ተግባራት በፓርቲው የአስተሳሰብ የበላይነት እንዲፈፀሙ በማስቻል ረገድ ውስንነት መኖሩን የፓርቲው ስራ አስፈጻሚ ኮሚቴ የገመገመ ሲሆን፣ በሌላ በኩል በመንግስት አፈፃፀም ላይ የመልካም አስተዳደርን ከማስፈን አኳያ የተጀመሩ ስራዎች ተጠናክረው እንዲቀጥሉ ውሳኔ አሳልፏል፡፡

የክልሉ ህዝብ በሁሉም አካባቢዎች የተረጋጋና አንጻራዊ ሰላም እንዲስፍን ከክልሉ መንግስትና ፀጥታ አካላት ጎን በመቆም ለተግባራዊነቱ ላሳየው ቁርጠኛና ተነሳሽነት ስራ አስፈጻሚ ኮሚቴው የላቀ ምስጋና አቅርቧል፡፡

በሀገሪቱ ብሎም በክልሉ ህዝቦች ትግል የተጀመረው ሰላም የማረጋገጥ፤ የዜጎች ደህንነትና የህግ የበላይነትን የማረጋገጥ ጥያቄ ከወትሮው በተለየ መልኩ በቁርጠኝነት እንደሚሰራና የለውጡ ስራ ሳይዛነፍ ግቡን እንዲመታ መላው የክልሉ ህዝብ የጀመረውን ድጋፍ ማጠናከር እንደሚጠበቅበት ተገልጿል፡፡

ከዚህ ባለፈም አሁን ያለውን አንጻራዊ ሠላም መላው የክልሉን ሕዝብ በማሳተፍ ሠላሙ በዘላቂነት እንዲረጋገጥ ማድረግ፣ ተፈጥረው በነበሩ ግጭቶች የተፈናቀሉ ዜጎችን ወደቀያቸው የማስመለስ እና በዘላቂነት የማቋቋም ሥራዎች ላይ ትኩረት ሰጥቶ መስራት የቀጣይ የትኩረት አቅጣጫዎች ናቸው ተብሏል፡፡

 

You might also like
Comments
Loading...