Fana: At a Speed of Life!

የባህር ዳር ዩኒቨርሲቲ ምስለ ሕክምና ማሰልጠኛ ማዕከል ተመረቀ

አዲስ አበባ፣ ጥቅምት 28፣2012 (ኤፍ ቢ ሲ) የባሕር ዳር ዩኒቨርሲቲ በኢትዮጵያ ደረጃ ሁለተኛ የሆነ የምስለ ሕክምና ማዕከል በትናንትናው ዕለት አስመርቆ ወደ ሥራ ማስግባቱን አስታውቋል፡፡

ምስለ ሕክምና ማዕከሉ በንድፈ ሐሳብ ብቻ ይሰጥ የነበረውን የሰመመን ሰጭ (አንስቴዢያ) ሕክምና ትምህርት ለመምህራንና ተማሪዎቻቸው በተግባር የተደገፈ እንዲሆን የሚያስችል ነው ተብሏል።

ማዕከሉ የሰውን አካላዊ ባሕሪ ተላብሰው በተሠሩ አሻንጉሊቶች የታገዘ የተግባር ትምህርት የሚሰጥበት መሆኑም ተመላክቷል።

ማዕከሉ ‹‹ኢምፓክት አፍሪካ›› በተባለ ድርጅት አማካኝነት ከመቀሌ ዩኒቨርሲቲ ቀጥሎ በኢትዮጵያ የተቋቋመ ሲሆን ፥ከ4 ሚሊዮን ብር በላይ ወጭ የተደረገበት መሆኑን አብመድ ዘግቧል።

የባሕር ዳር ዩኒቨርሲቲ የሰመመን ሕክምና ትምህርት ክፍል መምህርና የኢምፓክት አፍሪካ አስተባባሪ አቶ ገብረሕይወት አስፋው የማዕከሉ መከፈት የሕክምና ባለሙያዎችን ሙያዊ ብቃት ለማሳደግና በዘርፉ ያለውን የባለሙያዎችን እጥረት ለመቅረፍ እንደሚያስችል ተናግረዋል።

የሕክምና አስተማሪዎችም ሆኑ ተማሪዎች ለታካሚዎች ተገቢውን ሙያዊ አገልግሎት እንዴት መስጠት እንደሚቻል ከማወቅ ባለፈ ብቃታቸውን በተግባር እንዲፈትሹ በር የሚከፍት መሆኑንም ነው ያስረዱት።

በአሜሪካው ቫንደርቢልት ዩኒቨርሲቲ የሕክምና ትምህርት ክፍል መምህር ረዳት ፕሮፌሰር ባንታየሁ ስለሽ ደግሞ በሀገሪቱ ይህን መሰል አገልግሎት መሰጠት መጀመሩ ከባለሙያዎች ልምድ ማነስ ጋር ተያይዞ የሚፈጠሩ የሕክምና ስህተቶችን ለመቀነስ እንደሚያስችል አስረድተዋል።

የባሕር ዳር ዩኒቨርሲቲ ባለፈው ዓመት 15 የሰመመን ሰጭ ሕክምና ተማሪዎችን ማስመረቁ ይታወሳል።

በ2012 የትምህርት ዘመን ደግሞ ከ60 በላይ ተማሪዎችን በማስተማር ላይ እንደሚገኝ ከዩኒቨርሲቲው ያገኘነው መረጃ ያስረዳል።

 

You might also like
Comments
Loading...