Fana: At a Speed of Life!

የስኳር ህመም ቀን በዛሬው ዕለት ታስቦ ይውላል

አዲስ አባበ፣ ህዳር 4፣ 2012 (ኤፍ.ቢ.ሲ)አለም አቀፍ የስኳር ህመም ቀን ለ29ኛ ጊዜ በዛሬው ዕለት ታስቦ ይውላል፡፡

የስኳር ህመም ቀኑ ˝የስኳር ህመም ቤተሰቤን ይመለከታል˝ በሚል መሪ ቃል ታስቦ እንደሚውል ነው የተነገረው፡፡

የህሙማኑ ቁጥር እየተበራከተ መምጣቱን ተከትሎ የጤና ሚኒስቴር ተላላፊ ባልሆኑ በሽታዎች ላይ ትኩረት ሰጥቶ እየሰራ መሆኑን በሚኒስቴሩ የበሽታ መከላከል ዳይሬክተር ወይዘሮ ህይወት ሰለሞን ተናግረዋል።

እለቱ ሲከበር ህዝብ በሚበዛባቸው ቦታዎች ላይ ግንዛቤ ከመስጠት ባሻገር ነጻ የምርመራ አገልግሎት እንደሚሰጥም ገልፀዋል።

የስኳር ህመም በአለምና በሀገሪቱ በከፍተኛ ደረጃ እየተስፋፋ ሲሆን÷ ከስኳር ህመም ጋር ከሚኖሩ ሰዎች መካከል 80 በመቶ የሚሆኑት በማደግ ላይ በሚገኙ ሀገሮች ውስጥ እንደሚገኙ መገለፁን የኢዜአ ዘገባ ያመለክታል፡፡

የዓለም የስኳር ህመም ፌዴሬሽን በ2010 ዓ.ም ባወጣው መረጃ በዓለም ላይ 425 ሚሊየን ስዎች ከህመሙ ጋር ይኖራሉ፡፡

ኢትዮጵያ ውስጥም ከ3 ሚሊየን በላይ ህዝብ ከስኳር ህመም ጋር እንደሚኖር ነው የጤና ጥበቃ ሚኒስቴሩ በትናትናው ዕለት በሰጠው መግለጫ ያስተቀው፡፡

የስኳር ህመም የሚከሰተው ሰውነት ለኑሮም ሆነ ለእድገት የሚያስፈልገውን ስኳር በትክክል ለመጠቀም ሳይችል ሲቀር መሆኑን መረጃዎች ያመለክታሉ፡፡

አንድ ሰው በስኳር ህመም ተጠቅቷል የሚባለው የስኳር መጠን ከሚገባው በላይ ከፍ ብሎ ሲገኝ ነው፡፡

በደም ውስጥ የሚገኘው የስኳር መጠን ከመጠን በላይ ከፍ ብሎ የሚገኘው ደግሞ ቆሽት የተባለው የሰውነት ክፍል ኢንሱሊን የተሰኘው ሆርሞን በበቂ ሁኔታ ወይም ደግሞ ጭራሹኑ ማመንጨት ሲያቅተው ነው፡፡

የስኳር ህመም በሽንት ይበልጥ ደግሞ በደም ምርመራ ሊታወቅ ይችላል፤ የስኳር ህመም አንዴ ከያዘ በባህላዊ ሆነ በሳይንሳዊ የህክምና ዘዴ የማይድን የዕድሜ ልክ ህመም ቢሆንም ክትትልና ቁጥጥር ከተደረገበት ግን እንደማንኛውም ሰው ጤናማ ኑሮ ሊያስኖር የሚችል ነው፡፡

በተቃራኒው ደግሞ በተገቢው መንገድ ክትትልና ቁጥጥር ካልተደረገበት የተለያዩ ጠንቆችን ያስከትላል፡፡

በሲሳይ ጌትነት

You might also like
Comments
Loading...