Fana: At a Speed of Life!

የሲዳማ ሕዝበ ውሳኔ ልዩነትን በውይይትና በድምጽ መስጫ ሳጥን የመፍታት ዴሞክራሲያዊ የበላይነትን የሚያሳይ ነው- ጠ/ሚኒስትር ጽ/ቤት

አዲስ አበባ፣ ህዳር 11፣ 2012 (ኤፍ.ቢ.ሲ) የሲዳማ በክልልነት የመደራጀት ጥያቄ ሕዝበ ውሳኔ የድምጽ አሰጣጥ ሂደቱ ልዩነትን በውይይትና በድምጽ መስጫ ሳጥን የመፍታት ዴሞክራሲያዊ ሂደት የበላይነቱን እንዲቀጥል የማድረግ አቋምን የሚያሳይ መሆኑን የጠቅላይ ሚኒስትር ጽህፈት ቤት ገለፀ።

ጽህፈት ቤቱ የሲዳማ በክልልነት የመደራጀት ጥያቄ ሕዝበ ውሳኔ የድምጽ አሰጣጥ ሂደቱ በሰላማዊ መንገድ መጠናቀቁን አስመልክቶ ባወጣው መልእክቱ ነው ይንን ያለው።

በመልእክቱም፥ “የሲዳማ በክልልነት የመደራጀት ጥያቄ ሕዝበ ውሳኔ፣ የድምጽ አሰጣጥ ሰላማዊና ዴሞክራሲያዊ ሆኖ እንዲጠናቀቅ አስተዋጽዖ ያደረጋችሁ ዜጎች እና ተቋማት እንኳን ደስ ያላችሁ” ብሏል።

የሲዳማ ህዝበ ውሳኔ ድምጽ አሰጣጥ ሂደት በዛሬው እለት ከማለዳው 12 ሰዓት ጀምሮ ሲካሄድ መዋሉ ይታወሳል።

የሀዋሳ ከተማን ጨምሮ በሲዳማ ዞን በሚገኙ የምርጫ ጣቢያዎች የህዝበ ውሳኔው የድምፅ አሰጣጥ በሰላማዊ መንገድ መጠናቀቁንም የኢትዮጵያ ብሄራዊ ምርጫ ቦርድ በትናንትናው እለት ምሽት አስታውቋል።

You might also like
Comments
Loading...