Fana: At a Speed of Life!

ኬንያ ከኢትዮጵያ ጋር በቱሪዝም መስክ በጋራ መስራት እንደምትፈልግ ገለጸች

አዲስ አባበ፣ ህዳር 2፣ 2012 (ኤፍ.ቢ.ሲ) ኬንያ ከኢትዮጵያ ጋር በቱሪዝም መስክ በጋራ መስራት እንደምትፈልግ የኬንያ የቱሪዝም ሚኒስትር ናጂብ ባላላ  ገለፁ።

በኬንያ የኢትዮጵያ አምባሳደር መለስ ዓለም ከኬንያ የቱሪዝም ሚኒስትር ናጂብ ባላላ  ጋር ተወያይዋል፡፡

ሚኒስትሩ በውይይቱ ወቅት ኢትዮጵያና ኬንያ በቱሪዝም መስክ ለመተባበር የሚያስችላቸው የየራሳቸው የተለየ ጥቅም ላይ የሚውል አቅም እንዳላቸው  ገልፀዋል።

ኢትዮጵያና ኬንያ አንዱ የሌላውን የቱሪዝም መዳረሻዎች በማስተዋወቅ እና በአስጎብኚ ተቋሞቻቸው መካከል ትስስር በመፍጠር ከዘርፉ ተጠቃሚ መሆን እንደሚገባቸውም ነጂብ ባላላ ተናግረዋል።

አክለውም በኢትዮጵያ ያለውን የታሪክና የባህል የቱሪዝም መስህብ ተደራሽ ያደረገ ግንኙነት መመስረት እንደሚፈልጉ እና በቱሪዝም መስክ የሰው ኃይል ስልጠና በማዘጋጀት የሁለት አገሮች ዜጎች ተጠቃሚ እንዲሆኑ መስራት እንደሚገባም ጠቅሰዋል።

አምባሳደር መለስ ዓለም በበኩላቸው÷ ኢትዮጵያ በርካታ የቱሪዝም አማራጮች እንዳሏት አስረድተው የኢትዮጵያ አየር መንገድ በየቀኑ ወደ ኬንያ የሚያደርገው በረራ ለዚህ ከፍተኛ ድጋፍ እንደሚያበረክት ገልፀዋል።

ኢትዮጵያና ኬንያ ከግማሽ ምዕተ ዓመት በላይ ያስቆጠረ ግንኙነት እንዳላቸው የገለፁት አምባሳደሩ ÷በቀጣይም በቱሪዝም መስክ ያላቸውን ግንኙነት ወደ ላቀ ደረጃ ከፍ ለማድረግ እንደሚሰሩ አስታውቀዋል።

በመጨረሻም ናጂብ ባላላ   በቀጣይ በኬንያ ቱሪዝም ቦርድ የሚመራ ልዑክ ወደ ኢትዮጵያ እንደሚሄድና ጉብኝት እንደሚያደርግ መናገራቸውን ከውጪ ጉዳይ ሚኒስትር ቃል አቀባይ ፅህፈት ቤት ያገኘነው መረጃ ያመለክታል።

 

 

You might also like
Comments
Loading...