Fana: At a Speed of Life!

ከባንክ ደንበኞች ላይ ከ60 ሚሊየን ብር በላይ ያጭበረበሩ ተጠርጣሪዎች በቁጥጥር ስር ዋሉ

አዲስ አበባ ፣ ጥቅምት 28 ፣ 2012 (ኤፍ ቢ ሲ) የተሰረቁ ቼኮችን እና ሀሰተኛ ሰነዶችን በመጠቀም ከተለያዩ የመንግስትና የግል ባንክ ደንበኞች ላይ ከ60 ሚሊየን ብር በላይ ያጭበረበሩ ተጠርጣሪዎችን በቁጥጥር ስር ማዋሉን የአዲስ አበባ ፖሊስ ኮሚሽን አስታወቀ።

በተጠርጣሪዎቹ ላይ ከፌደራልና ከአዲስ አበባ ፖሊስ ኮሚሽን የተውጣጣ የምርመራና የክትትል ቡድን በማዋቀር ምርመራው መጀመሩን በኮሚሽኑ የከባድ ሌብነትና ዘረፋ ምርመራ ማስተባበሪያ ኃላፊ ኢንስፔክተር ያሬድ አለማየሁ ገልፀዋል።

በወንጀሉ ተጠርጥረው የተያዙት ከ70 በላይ ግለሰቦች ከተለያዩ የግል ተቋማት ቼኮችን በመስረቅ እና ሀሰተኛ ሰነዶችን በመጠቀም የኢትዮጵያ ንግድ ባንክን ጨምሮ ከተለያዩ የግል ባንክ የደንበኞች የባንክ ሂሳብ ውስጥ 60 ሚሊየን 843 ሺህ 601 ብር ወጪ አድርገው መውሰዳቸው በምርመራ ተረጋግጧል ብለዋል።

በተመሳሳይ መንገድ ወጪ ተደርጎ ሊወሰድ በሂደት ላይ የነበረ ከ28 ሚሊየን ብር በላይ ማዳን መቻሉን እና ከተጠርጣሪዎቹ እጅ የተለያዩ የባንክ ቼኮች እንዲሁም ለወንጀል መፈፀሚያነት የሚጠቀሙባቸው ቁሳቁሶች መያዛቸውንም ተናግረዋል።

ከዚህ ጋር ተያይዞም በተጠርጣሪዎቹ የባንክ ሂሳብ ቁጥር ውስጥ የተገኘ ከ16 ሚሊየን ብር በላይ እንዲታገድ መደረጉን ከኮሚሽኑ ያገኘነው መረጃ ያመላክታል።

ተጠርጣሪዎቹ ወንጀሉን የፈፀሙት ከኢትዮ ቴሌኮም፣ ከባንኮች፣ ከወረዳ አስተዳደር፣ ከሰነዶች ምዝገባና ማረጋገጫ ፅህፈት ቤት እንዲሁም ከሌሎች ተቋማት መረጃ የሚሰጧቸውን ሰራተኞች በመመልመል መሆኑንም ጠቅሰዋል።

 

You might also like
Comments
Loading...