Fana: At a Speed of Life!

የከፍተኛ ትምህርት አግባብነት እና ጥራት ኤጀንሲ በሁለት የግል ኮሌጆች ላይ እርመጃ ወሰደ

አዲስ አበባ ፣ህዳር 9፣2012 (ኤፍ ቢ ሲ) የከፍተኛ ትምህርት አግባብነት እና ጥራት ኤጀንሲ በሁለት የግል ኮሌጆች ላይ እርመጃ መውሰዱን አስታውቋል

በመመሪያ ጥሰት ምክንያት እርምጃ የተወሰደባቸው ኮሌጆችም ፓራዳይዝ ቫሊ ኮሌጅ (አዳማ ካምፓስ ) እና ኢትዮ ስማርት ኮሌጅ (አድዋ ካምፓስ) መሆናቸው ተገልጿል።

ኤጀንሲው የፓራዳይዝ ቫሊ ኮሌጅ አዳማ ካምፓስ የእውቅናና ፈቃድ ባልተሰጠባቸዉ በአውቶሞቲቭ ቴክኖሎጂና አውቶሞቲቭ ኢንጂነሪንግ የትምህርት መስኮች ተማሪዎችን መዝግቦ በማስተማሩ ምክንያት በተደጋጋሚ የማስጠንቀቂያ ደብዳቤ የተሰጠው መሆኑን አስታውሷል።

ይሁን እንጂ ተቋሙ ማስጠንቀቂያውን ወደ ጎን በመተው በአዳማ ካምፓስ በፋርማሲ የትምህርት መስክ የእውቅና ፈቃድ ሳይኖረዉ ተማሪዎችን በመቀበል እያስተማረ መሆኑ ተደርሶበታል።

በተጨማሪም በአድዋ የሚገኘው ኢትዮ ስማርት ኮሌጅ በማስተርስ ኦፍ ቢዝነስ አድሚንስትሬሽን እና በማስተር ኦፍ ሳይንስ ኢን አካውንቲንግ ኤንድ ፋይናንስ የተሰጠውን እዉቅና እና ፈቃድ በመጠቀም በሰባት የኤም ቢ ኤ ዘርፎች የእውቅና ፈቃድ እንደተሰጣቸው በማስመሰል የተሳሳተ መረጃ ሲያሰራጭ ተደርሶበታል።

ከዚህ ባለፈም በየአመቱ ለእያንዳንዱ የትምህርት መስክ ከ40 ያልበለጡ ተማሪዎች እንዲቀበል የተሰጠውን የፈቃድ ሰርተፈኬት እንደገና በመከለስና በማስተካከል በየዓመቱ በእያአንዳንዱ የትምህርት መስክ 250 ተማሪዎችን የመቀበል ፈቃድ እንደተሰጠው አስመስሎ በማስተዋወቅ ለማህበረሰቡ የተሳሳተ መረጃን ሲያሰራጭ ተደርሶበታል።

በተጨማሪም ኮሌጁ በኮምፒውተር ኢንጂነሪንግ የዕውቅና ፈቃድ ሳይኖረው ተማሪዎችን ተቀብሎ በማስተማር ላይ የሚገኝ መሆኑ ተመላክቷል።

በመሆኑም የፓራዳይዝ ቫሊ ኮሌጅ አዳማ ካምፓስ ከዛሬ ህዳር 09 ቀን 2012 ጀምሮ በፈፀው የመመሪያ ጥሰት ምክንያት ኮሌጁ ሙሉ በሙሉ እንዲዘጋ እንዲሁም ኢትዮ ስማርት ኮሌጅ አድዋ ካምፓስም በድህረ ምረቃ የተሰጠዉ የእውቅና ፈቃድ እንዲሰረዝ ተወስኗል።

ስለሆነም በካምፓሱ የእውቅና ፈቃድ በተሰጣቸዉ የትምህርት መስኮች እየተማሩ ያሉ ህጋዊ ተማሪዎችን ህጋዊ ሰዉነት ወዳላቸዉ ሌሎች ኮሌጆች ለማዘዋወር ኮሌጆቹ የተማሪዎችን ስም ዝርዝር እስከ ህዳር 17 ቀን 2012 ዓ.ም ድረስ ሪፖርት እንዲያደርጉ ተጠይቋል።

በፀጋዬ ወንድወሰን

You might also like
Comments
Loading...