Fana: At a Speed of Life!

ኢትዮጵያ እና ኤርትራ በኢኖቬሽንና ቴክኖሎጂ ዘርፎች በጋራ ሊሰሩ ነው

አዲስ አበባ፣ ጥቅምት 21፣ 2012 (ኤፍ.ቢ.ሲ) ኢትዮጵያ እና ኤርትራ በኢኖቬሽንና ቴክኖሎጂ ዘርፎች በጋራ ሊሰሩ መሆኑ ተገልጿል።

የኢኖቬሽንና ቴክኖሎጂ ሚኒስትር ዶክተር ኢንጂነር ጌታሁን መኩሪያ በኢትዮጵያ ከኤርትራ አምባሳደር ሰመረ ርዕሶም ጋር ሁለቱ ሀገራት በኢኖቬሽን እና ቴክኖሎጂ ዘርፎች በጋራ መስራት በሚችሉበት ሁኔታ ላይ ተወያይተዋል፡፡

በውይይታቸው ኢትዮጵያ በሆስፒታሎች እየዘረጋች ያለችው ዘመናዊ የህክምና አስተዳደር ስርዓት በኤርትራ ሆስፒታሎችም ለመተግበር በሚቻልበት ሁኔታ ላይ መክረዋል።

ከዚህ ባለፈም በኢትዮጵያ በኢኖቬሽንና ቴክኖሎጂ ዘርፍ የሚሰሩ ኩባንያዎች በኤርትራም መስራት በሚችሉበት እና በዘርፉ የተሰማሩ ባለሙያዎችም ስልጠና እና የልምድ ልውጥ ማድረግ በሚችሉበት ሁኔታ ላይም ተወያይተዋል።

በቀጣይ ሁለቱ ሀገራት በጋራ መስራት የሚያስችሉ ጉዳዮችን ለይተው የመግባቢያ ስምምነቶችን በመፈራረም ወደ ተግባር እንደሚገቡ ይጠበቃል።

የኢኖቬሽንና ቴክኖሎጂ ሚኒስቴር ዘመናዊ የህክምና አስተዳደር ስርዓትን ለጥቁር አንበሳ ስፔሻላይዝ ሆስፒታልና ለልብ ህክምና ማዕከል በኢትዮጵያ ዘርግቶ እየሰራ መሆኑን ከኢኖቬሽን እና ቴክኖሎጂ ሚኒስቴር ያገኘነው መረጃ ያመላክታል።

ሚኒስትሩ ዶክተር ኢንጂነር ጌታሁን መኩሪያ ለልብ ህክምና ማዕከል በኢትዮጵያ የተዘረጋውን የህክምና አስተዳደር ስርዓት መርቀው ሲያስረክቡ ስርዓቱን ለጎረቤት ሀገራት ሆስፒታሎች ጭምር መዘርጋት እንደሚችሉ መናገራቸው ይታወሳል።

You might also like
Comments
Loading...