Fana: At a Speed of Life!

ኢትዮጵያ በአሜሪካው ውይይት በአባይ ወንዝ ላይ ፍትሃዊና ሚዛናዊ የውሃ መብት እንዳላት አስታውቃለች

አዲስ አበባ፣ ጥቅምት 28፣2012 (ኤፍ ቢ ሲ) በውጭ ጉዳይ ሚኒስትር አቶ ገዱ አንዳርጋቸው የተመራው የኢትዮጵያ መንግስት ከፍተኛ የልዑካን ቡድን በአሜሪካ የገንዘብ ሚኒስትር ጋባዥነት በታላቁ የኢትዮጵያ ህዳሴ ግድብ ዙሪያ ሲያካሂድ የነበረውን ውይይት አጠናቋል፡፡

የውይይቱን መጠናቀቅ አስመልክተው የውጭ ጉዳይ ሚኒስትሩ አቶ ገዱ አንዳርጋቸው፣ ዶክተር ስለሺ በቀለ እና አምባሳደር ፍጹም አረጋ ጋዜጣዊ መግለጫ ሰጥተዋል::

በመግለጫቸውም ኢትዮጵያ በናይል ወንዝ ላይ ፍትሃዊና ሚዛናዊ የውሃ መብት እንዳላትም ማስገንዘቧን ነው ያስታወቁት፡፡

ኢትዮጵያ የኤሌክትሪክ ኃይል የማያገኝ 70 ሚሊየን ህዝቧ የኤሌክትሪክ ሀይል ተደራሽ ለማድረግ እና ለድህነት ቅነሳ ጥረቷ እንጂ ማንንም አካል የመጉዳት አላማ እንደሌላት አስታውቃለች ብለዋል፡፡

እንዲሁም ለሶስትዮሽ ውይይቱ አሁንም ትልቅ ግምት እንደምትሰጥ እና በግድቡ ዙሪያ ያሉ ማናቸውም አለመግባባቶች በቴክኒክ ባለሙያዎች ሙያዊ ምክክር ብቻ እንደሚፈቱ እንደምታምን አስረድታለች።

በህዳሴ ግድቡ ዙሪያ የነበሩ ብዥታዎችን ግልጽ ለማድረግና የኢትዮጵያ አቋም ገንቢ መሆኑን ለማስረዳትም የምክክር መድረኩ ጠቃሚ እንደነበር በመግለጫው ተገልጿል።

ፕሬዚዳንት ትራምፕ ታላቁ የኢትዮጵያ ህዳሴ ግድብ ሲጠናቀቅ በቦታው በመገኘት ሪቫን አብረው በመቁረጥ ለመመረቅ ፍላጎት እንዳላቸው መግለጻቸውን በመግለጫው ላይ ተጠቁሟል::

በተደረገው ውይይት መሰረትም የሶስቱ ሀገራት ሚኒስትሮች በታላቁ የህዳሴ ግድብ አሞላል ዙሪያ ገንቢ፣ ቀጣይነት ያለውና የጋራ ተጠቃሚነትን የሚያረጋግጥ ስምምነት ላይ ለመድረስ መስማማታቸውን በአሜሪካ ከኢትዮጵያ ኤምባሲ ያገኘነው መረጃ ያመለክታል፡፡

You might also like
Comments
Loading...