Fana: At a Speed of Life!

ኢትዮጵያ በቅርቡ የ5ጂ የኢንተርኔት መሰረተ ልማትን ልታስተዋውቅ ነው

አዲስ አበባ፣ ህዳር 12፣ 2012(ኤፍ ቢሲ) ኢትዮጵያ በቅርቡ የአምስተኛው ትውልድ (5ጂ) የኢንተርኔት መሰረተ ልማትን ልታስተዋውቅ መሆኑ ተገለፀ።

በአፍሪካ ዘመናዊ የባንክ አገልግሎትና የተንቀሳቃሽ ስልክ ግብይት ላይ የሚነጋገር ስብሰባ አዲስ አበባ ውስጥ እየተካሄደ ነው።

በቅርቡ የተቋቋመው የኢትዮጵያ ኮሙዩኒኬሽን ባለሥልጣን ዋና ዳይሬክተር አቶ ባልቻ ሬባ እንደተናገሩት፥ መንግሥት ኮሙዩኒኬሽን ሥርዓቱን ለማዘመን እየሰራ ነው።

በዚህም መሰረት ባለስልጣኑ በተለይም የኮሙዩኒኬሽን መሰረተ-ልማት አቅርቦትን ለማስፋፋትና በዘርፉ አዳዲስ ቴክኖሎጂዎችን ለመተግበር ጥረት እያደረገ ይገኛል ብለዋል።

የመሰረተ-ልማት ማስፋፊያው የሚከናወነው በሃገሪቱ የቴሌኮም ኦፕሬተሮች በሚኖራቸው ደረጃ ላይ በመመስረት መሆኑን ተናግረዋል።

በሃገሪቱ ያሉት የኢንተርኔት ቴክኖሎጂዎች ባለው የኔትወርክ መሰረተ-ልማት ላይ የሚበለጽጉና የሚያድጉ ናቸው ብለዋል።

አሁን ላይ ያለውን አራተኛው ትውልድ (4ጂ) የኢንተርኔት መሰረተ ልማት አገልግሎት ሽፋን ወደሌሎች የሃገሪቱ ክልሎች ሙሉ በሙሉ ለማስፋፋት እየተሰራ መሆኑንም አንስተዋል።

አዳዲስ የቴሌኮም አቅራቢ ድርጅቶች ወደ ሃገር ይገባሉ ተብሎ ስለሚጠበቅም በቅርቡ 5ኛው ትውልድ (5ጂ) በኢትዮጵያ ይተዋወቃል ማለታቸውን ኢዜአ ዘግቧል።

 

You might also like
Comments
Loading...