Fana: At a Speed of Life!

ኢትዮጵያ በሰላም እጦት ሳቢያ ከኢንቨስትመንት ዘርፍ በሩብ ዓመቱ 300 ሚሊየን ዶላር ገቢ ማጣቷ ተገለጸ  

አዲስ አበባ፣ህዳር 6፣2012 (ኤፍ ቢ ሲ) በሀገሪቱ በሰላም እጦትና በሌሎች ተዛማጅ ጉዳዮች ሳቢያ በተያዘው የበጀት ዓመት የመጀመሪያ ሶስት ወር ከኢንቨስትመንት ዘርፍ ለማግኘት ከታቀደው ውስጥ 300 ሚሊየን ዶላር ገቢ እንዳጣች የኢንቨስትመንት ኮሚሽን ገለጸ።

በሀገሪቱ በየጊዜው በሚቀሰቀሰው ግጭትና የሰላም እጦት እንዲሁም በሌሎች ተዛማጅ ጉዳዮች ሳቢያ የኢንቨስትመንት ኮሚሽን የዕቅዱን ያህል መስራት እንዳልቻለ አስታውቋል።

በሩብ ዓመቱ ከኢንቨስትመንት ዘርፍ አንድ ቢሊየን ዶላር ገቢ ለማግኘት አቅዶ ማሳካት የቻለው የዕቅዱን 70 በመቶ ብቻ ነው።

የኢትዮጵያ ኢንቨስትመንት ምክትል ኮሚሽነር ወይዘሮ ሀና አርአያስላሴ እንደገለጹት፥ለዕቅዱ አለመሳካት ዋናው ምክንያት በየወቅቱ በሀገሪቱ የሚቀሰቀሰው ግጭት ነው።

የኢንዱስትሪ ፓርኮች መስፋፋትና ወደ ግንባታ መግባት፣ የተመቻቻ ፖሊሲና አሰራር መዘርጋት፣ ለቀጥተኛ ኢንቨስትመንት መሻሻልና የባለሃብቶችን ቀልብ ለመሳብ ከፍተኛ እገዛ ማድረጉ ይታወሳል።

በተለይ በተሰራው የዲፕሎማሲ ስራ በርካታ የውጭ ባለሃብቶች በሀገሪቱ መዋዕለ ንዋያቸውን ለማፍሰስ ከመቼውም ጊዜ በላይ ፍላጎት ማሳያታቸውን ምክትል ኮሚሽነሯ ተናግረዋል።

”አንዳንዶች ወደ ስራ የሚያስገባቸውን ሂደት ቢጨርሱም በሰላም እጦት ሳቢያ ወደ ስራ የሚገቡበትን ጊዜ ማራዘማቸውን ነግረውናል” ብለዋል።

ከሐምሌ እስከ መስከረም ድረስ ከተያዘው ዕቅድ አብዛኛውን ለማሳካት የሚያስችሉ አመላካች ነገሮች መኖራቸውን አስታውሰዋል።

በተለይ በሀገሪቱ የተቃውሞ ሰልፍ ሲደረግ የመጀመሪያ ጥቃት የሚደርስባቸው የኢንቨስትመንት ቦታዎች መሆናቸው ደግሞ ለስራው ባለሃብቶችን ስጋት ላይ እንደጣላቸው ተናግረዋል።

ከዚህም በተጨማሪ በመንገድ መዘጋት ግብዓቶችን በሚፈለገው ሰዓት ወደ ሚፈለገው ቦታ ባለመድረስ በኢንቨስትመንት ላይ የተመማሩ ባለሃብቶች ከፍተኛ ችግር እንደገጠማቸው ገልጸዋል።

”የተረጋጋ ሁኔታ በሌለበት ኢንቨስትመንትን ማሳደግ አይቻልም” የሚሉት ወይዘሮ ሃና፥ የሰላም መደፍረስ ኮሚሽኑን ዕቅዱን እንዳያሳካ እንቅፋት እንደሆነበት አስረድተዋል።

በተጠናቀቀው ሩብ ዓመት በኢንቨስትመንት ዘርፉ 25 ሺህ አዳዲስ የስራ እድሎች ተፈጥረዋል።

በተያዘው በጀት ዓመት ከዘርፉ ከ4 ነጥብ 1 ቢሊየን ዶላር በላይ ገቢ ለማስገባት እቅድ ተይዟል።

ምንጭ ፦ኢዜአ

You might also like
Comments
Loading...