Fana: At a Speed of Life!

ኢትዮጵያውያን አትሌቶች በዓለም አቀፍ የማራቶን ውድድሮች ድል ቀንቷቸዋል

አዲስ አበባ፣ ጥቅምት 23፣ 2012 (ኤፍ.ቢ.ሲ) ኢትዮጵያውያን አትሌቶች ዛሬ በአውሮፓና እስያ በተካሄዱ ዓለም አቀፍ የማራቶን ውድድሮች ድል ቀንቷቸዋል።

በቱርክ በተካሄደው የኢስታንቡል ማራቶን በሴቶች አትሌት ሂሩት ጥበቡ 2 ሰዓት ከ23 ደቂቃ ከ40 ሴኮንድ አሸናፊ በመሆን በርቀቱ ሁለተኛ የግል ምርጥ ሰዓቷን ማስመዝገብ ችላለች።

አትሌት ትዕግስት ባይቸው 2 ሰዓት ከ24 ደቂቃ ከ15 ሴኮንድ ሁለተኛ ስትወጣ በተጨማሪም እ.አ.አ በ2017 በቻይና ታይዩዋን ማራቶን በርቀቱ ያስመዘገበችውን የግል ምርጥ ሰዓቷን በ5 ደቂቃ ከ57 ሴኮንድ አሻሽላለች።

በውድድሩ ኬንያዊቷ አትሌት ማውሪን ቼፕኬሞይ 2 ሰዓት ከ24 ደቂቃ ከ16 ሴኮንድ ሶስተኛ ወጥታለች።

በወንዶች ኬንያዊው አትሌት ዳንኤል ኪቤት 2 ሰዓት ከ9 ደቂቃ ከ44 ሴኮንድ ሲያሸንፍ ኢትዮጵያዊው አትሌት ይታያል አጥናፉ 2 ሰዓት ከ9 ደቂቃ ከ57 ሴኮንድ ሁለተኛ ወጥቷል።

ሌላኛዋ ኬንያዊ አትሌት ፒተር ክዌሞይ 2 ሰዓት ከ10 ደቂቃ ከ9 ሴኮንድ ሶስተኛ ወጥቷል።

በኢስታንቡል ማራቶን ሁለቱም ጾታዎች ያሸነፉ አትሌቶች የ50 ሺህ ዶላር ሽልማት እንደሚያገኙ የቱርኩ የዜና ወኪል አናዶሉ ዘገባ ያመለክታል።

በሌላ በኩል ዛሬ በቻይና የቤጂንግ ማራቶን በሴቶች አትሌት ሱቱሜ አሰፋ 2 ሰዓት ከ23 ደቂቃ ከ31 ሴኮንድ አሸናፊ ሆናለች።

ቻይናዊቷ አትሌት ሊ ዢዋን 2 ሰዓት ከ29 ደቂቃ ከ6 ሴኮንድ ሁለተኛ ደረጃን ስትይዝ አትሌት ሙሉ ሰቦቃ በ2 ሰዓት ከ29 ደቂቃ ከ9 ሴኮንድ ሶስተኛ መውጣቷን የቻይናው ዜና ወኪል ዢንዋ በድረ ገጹ አስፍሯል።

በወንዶች ኬንያውያኑ አትሌቶች ማቲው ኪሶሪዮ፣ ሰለሞን ኪርዋ እና ኢማኑኤል ሩቶ በቅደም ተከተል ከአንድ እስከ ሶስት በመውጣት በበላይነት አጠናቀዋል።

በሁለቱም ጾታዎች ያሸነፉት አትሌቶች 40 ሺህ የአሜሪካን ዶላር ሽልማት ያገኛሉ።

ምንጭ፦ ኢዜአ

You might also like
Comments
Loading...