Fana: At a Speed of Life!

አዲስ አበባ ዩኒቨርሰቲ ከአፍረካ ምርጥ 10 ዩኒቨርሲቲዎች አንዱ መሆን የቻለው ባሳየው ጥረትና መሻሻል ነው- ፕ/ር ጣሰው

አዲስ አበባ፣ ጥቅምት 27፣ 2012 (ኤፍ.ቢ.ሲ) የአዲስ አበባ ዩኒቨርሰቲ ከአፍረካ ምርጥ 10 ዩኒቨርሲቲዎች አንዱ መሆን የቻለው በየጊዜው ባሳየው ጥረት እና መሻሻል መሆኑን የዩኒቨርሲቲው ፕሬዚዳንት ፕሮፌሰር ጣሰው ወልደሃና ገለፁ።

የአዲስ አበባ ዩኒቨርሰቲ በአፍረካ ካሉ ምርጥ 10 ዩኒቨርሲቲዎች አንዱ ሆኖ መመረጡን ተከትሎ በዛሬው እለት መግለጫ ሰጥቷል።

የዩኒቨርሲቲው ፕሬዚዳንት ፕሮፌሰር ጣሰው ወልደሃና በመግለጫው፥ ዩኒቨርሲቲው በቀዳማዊ ኃይለስላሴ ዘመነ መንግሰት በ1950 ዓ.ም መቋቋሙን ገልፀዋል።

ዩኒቨርሲቲው ሲመሰረት የመቀበል አቅሙ 33 ተማሪዎችን ብቻ ሲሆን፥ ዛሬ ላይ የቅበላ አቅሙን እስከ 50 ሺህ ማድረሱን አስታውቀዋል።

እንዲሁም ዩኒቨርሲቲው 13 ካምፓሶች፣ 10 ኮሌጆች፣ 2 የቴክኖሎጂ ኢንስቲቲዩቶች፣ 12 የምርምር ኢንስቲቲዩቶች እና 2 የማስተማሪያና የከፍተኛ ህክምና መስጫ ሆስፒታሎችን በመያዝ በተለያዩ የትምህርት መርሃ ግብሮች ማለትም በ73 የትምህርት መስኮች የመጀመሪያ ዲግሪ መርሃ ግብር፣ በ345 የድህረ ምረቃ መርሃ ግብሮች፣ በ90 የጥናትና ምርምር መስኮች የዶክትሬት መርሃ ግብሮችን እያከናወነ እንደሚገኝም አስታውቀዋል።

ይህንን ተከትሎም ዩኒቨርሲቲው በተለያዩ ጊዜያት የተለያዩ ዓለም አቀፋዊ እውቅናዎችን እና ደረጃዎችን አግኝቷል ያሉት ፕሮፌሰር ጣሰው፥ ከነዚህም የቅርብ የሆኑት በአውሮፓውያኑ በ2014 ከአፍሪካ ምርጥ ዩኒቨርሲቲዎች 18ኛ ደረጃ፣ በ2015 ከአፍሪካ ምርጥ ዩኒቨርሲቲዎች የ16ኛ ደረጃን እንግኝቶ ነበር ብለዋል።

በያዝነው በአውሮፓውያኑ በ2019 ደግሞ አዲስ አበባ ዩኒቨርሲቲ ከአፍሪካ ምርጥ ዩኒቨርሲቲዎች በ10ኛ ደረጃ ሆኖ ሊመዘገብ መቻሉንም ነው ፕሮፌሰር ጣሰው የገለፁት።

አዲስ አበባ ዩኒቨርሲቲ እዚህ ደረጃ የደረሰው በየጊዜው ባሳየው ጥረት እና መሻሻል እንዲሁም በሚያደርገው ጥናትና ምርምር ኢትዮጵያ ከምትፈልገው የተማረ የሰው ሀይል ፍላጎት ጋር ለማጣጣም በተደረገው ጥረት መሆኑንም አስታውቀዋል።

አዲስ አበባ ዩኒቨርሲቲ የኢትዮጵያ ኩራት ነው ያሉት ፕሮፌሰር ጣሰው፥ አዲስ አበባ ዩኒቨርሲቲ ትንሿ ኢትዮጵያ ነው፤ ዩኒቨርሲቲው ሌሎች ኢትዮጵያውያ ዩኒቨርስቲዎችን በያዘው የእድገት እና የመሻሻል ጉዞ ላይ የመውሰድ ግዴታ አለበትም ብለዋል።

የአዲስ አበባ ዩኒቨርሲቲ የአድሚኒስትሬሽን እና የተማሪዎች አገልግሎት ምክትል ፕሬዚዳንት ዶክተር ማቲዎስ ኢንሰርሙ በበኩላቸው፥ ኢትዮጵያ ካስመዘገበችው እድገት በተጨማሪ አዲስ አበባ ዩኒቨርስቲ እዚህ ደረጃ የደረሰው ከተለያዩ የዓለም ክፍሎች ተማሪዎችን ተቀብሎ ለማስተማር ባለው ተልእኮ ነው ብለዋል።

You might also like
Comments
Loading...