Fana: At a Speed of Life!

አዲሱ ውህድ ፓርቲ ብልጽግናን ለኢትዮጵያ በቁስ ብቻ ሳይሆን በሁለንተናዊ መስመር የሚያረጋግጥ ይሆናል- ጠ/ሚ ዶ/ር አብይ

 

አዲስ አበባ፣ ህዳር 9፣ 2012 (ኤፍ.ቢ.ሲ) አዲሱ የኢህአዴግ ውህድ ፓርቲ ብልጽግናን ለኢትዮጵያ በቁስ ብቻ ሳይሆን በሁለንተናዊ መስመር የሚያረጋግጥ እንደሚሆን ጠቅላይ ሚኒስትር ዶክተር አብይ አህመድ ገለጹ።

የኢፌዴሪ ጠቅላይ ሚኒስትር እና የኢህአዴግ ሊቀ መንበር ዶክተር አብይ አህመድ በኢህአዴግ ስራ አስፈፃሚ ኮሚቴ ስብሰባ እና በፓርቲው ውህደት ዙሪያ በፌስ ቡክ ገፃቸው መልእክት አስተላልፈዋል።

በመልእክታቸውም ላለፉት ሶስት ቀናት የኢህአዴግ የስራ አስፈፃሚ ኮሚቴ ባካሄደው ስብሰባ በኢህአዴግ ውህደት፣ በአዲሱ ፓርቲ ፕሮግራም እና ህገ ደንብ ዙሪያ በመወያየት፤ በሶስቱም አጀንዳ ላይ የሚያግባባ እና የሚያቀራርብ እንዲሁም ዴሞክራሲያዊ በሆነ መንገድ ሁሉም ሀሳብ በነፃነት እንዲንሸራሸር በማድረግ ውሳኔዎችን አሳልፏል ብለዋል።

ይህ ለኢትዮጵያ ህዝብ እና ለመላው የፓርቲው አባላት ታላቅ ድል ስለሆነ እንኳን ደስ አላችሁ ሲሉም መልእክታቸውን አስተላልፈዋል።

በውይይቱ የመጀመሪያ ቀን ለየብቻ የነበሩ ፓርቲዎች ተዋህደው የብልፅግና ፓርቲ ተብለው፤ ብልጽግና ለኢትዮጵያ በቁስ ብቻ ሳይሆን በክብርም፤ በነጻነትም፤ በሁሉም ሁለንተናዊ ብልጽግና ማረጋገጥ የሚችል ፓርቲ እንዲሆን እና አሁን ባለችዉ ኢትዮጵያ ውስጥ የተበታተነ ጉልበት ሰብሰብ ብሎ በጋራ መቆምና መምራት እንድንችል መወሰናችን እጅግ በጣም ትልቅ ውሳኔ ነበር ብለዋል።

በዚህ ውሳኔ ውስጥ እያንዳንዱ እርምጃ ህግን የተከተለ እንዲሆን እና በውይይት ዴሞክራሲያዊ መንገድ እንዲፈፀም በማድረግ የተሳካ ውጤት ማምጣት ተችሏል ብለዋል።

የፌደራል ስርዓቱ በየጊዜው የሚሻሻል እና የሚያድግ በመሆኑ እስካሁን የነበሩ ስህተቶችን በሚያርም እና ሁሉንም ብሄር ብሄረሰቦች ቋንቋ የሚያከብር እውቅና የሚሰጥ እንዲሁም ሁሉን ባሳተፈ እና በሚገባቸው ልክ የሚያስፈልጋቸውን ማቅረብ በሚያስችል ማንነት የሚደራጅ ፓርቲ እንዲሆን መወሰኑንም አስታውቀዋል።

በዚህም አግባብ ፓርቲው ከአማርኛ በተጨማሪ ኦሮምኛ፣ ትግርኛ፣ ሶማልኛ እና አፋርኛን የፓርቲው የስራ ቋንቋ አድርጎ ከመወሰኑም በላይ እነዚህ ቋንቋዎች የፌዴራል የስራ ቋንቋ እንዲሆን ይሰራልም ነው ያሉት ዶክተር አብይ።

ሙሉ መልእክታቸውን ከተከታዩ ቪዲዮ ይመልከቱ፦ https://www.youtube.com/watch?v=0m5TRUFLQ3M

You might also like
Comments
Loading...