Fana: At a Speed of Life!

አሜሪካ ከፓሪሱ የአየር ንብረት ስምምነት እየወጣች መሆኑን ለተመድ አስታወቀች

አዲስ አበባ፣ ጥቅምት 25፣ 2012 (ኤፍ.ቢ.ሲ) አሜሪካ ከፓሪሱ የአየር ንብረት ለውጥ ስምምነት እየወጣች መሆኑን ለተባበሩት መንግስታት ድርጅት በይፋ አስታውቃለች።

የአሜሪካ የውጭ ጉዳይ ሚኒስትር ማይክ ፖምፔዮ በትናንትናው እለት እንዳስታወቁት፥ አሜሪካ የአየር ንብረት ለውጥን ለመከላከል በአውሮፓውያኑ 2015 በፓሪስ ከተፈረመው ስምምነት መውጣት መጀመሯን ገልፀዋል።

በዓለማችን ላይ ከፍተኛ ካርቦን ወደ ከባቢ አየር ከሚለቁ ሀገራት አንዷ የሆነችው አሜሪካ ያሳለፈችው ውሳኔ ከስምምነቱ የወጣች ብቸኛ ሀገር እንደሚያደርጋትም ተነግሯል።

አሜሪካ ከስምምነቱ ለመውጣት የወሰነችውም ፕሬዚዳንት ዶናልድ ትራምፕ የሀገሪቱን የነዳጅ፣ የጋዝ እና የክሰል ድንጋይ እንዱስትሪ ለማሳደግ ቃል መግባታቸውን ተከትሎ እንደሆነም ይታወቃል።

የውጭ ጉዳይ ሚኒስትሩ÷ በፓሪሱ ስምምነት የካርቦን ልቀትን ለመቀነስ የተላለፈው ውሳኔ በአሜሪካ ላይ ፍትሃዊ ያልሆነ የኢኮኖሚ ጫናን የፈጠረ ነው ብለዋል።

የአሜሪካ የውጭ ጉዳይ ሚኒስቴር መስሪያ ቤት ለተባበሩት መንግስታት ዋና ፀሃፊ አንቶኒዩ ጉቴሬስ በላከው ደብዳቤም፥ የአሜሪካ ከፓሪሱ ስምምነት የመውጣት ሂደት እስከ ቀጣዩ ዓመት ጥቅምት ወር እንደሚጠናቀቅ አስታውቋል።

እንደ አውሮፓውያኑ አቆጣጠር በ2015 የተፈረመው የፓሪሱ የአየር ንብረት ስምምነትን ከ200 ሀገራት በላይ መፈረማቸውን ማሳረፋቸው ይታወሳል።

ስምምነቱም ሀገራቱ ወደ ከባቢ አየር የሚለቁትን የካርቦን መጠን እንዲቀንሱ የሚያዝ ሲሆን፥ በስምምነቱ መሰረትም አሜሪካ በአውሮፓውያኑ እስከ 2030 ድረስ ወደ ከባቢ አየር የምትለቀውን የካርቦን መጠን ከ26 እስከ 28 በመቶ እንድትቀንስ የሚያደርግ ነው።

ምንጭ፦ www.aljazeera.com

You might also like
Comments
Loading...