Fana: At a Speed of Life!

አሜሪካ ቱርክ የሩሲያን ኤስ 400 ሚሳኤል ከመግዛት እንድትቆጠበ አሳሰበች

አዲስ አበባ፣ህዳር 4፣2012 (ኤፍ ቢ ሲ) የአሜሪካው ፕሬዚዳንት ዶናልድ ትራምፕ ቱርክ የሩሲያን ኤስ 400 ፀረ አውሮፕላን ሚሳኤል ከመግዛት እንድትቆጠብ አሳስበዋል።

ፕሬዚዳንት ትራምፕ እና የቱርክ አቻቸው ፕሬዚዳንት ሬሲፕ ጣይፕ ኤርዶኻን በትናንትናው ዕለት በነጩ ቤተ መንግስት ተወያይተዋል።

በውይይታቸውም በዋሽንግተን እና አንካራ መካከል ያለውን የሁለትዮሽ ግንኙነት ይበልጥ ማጠናከር በሚችሉባቸው ጉዳዮች ዙሪያ መክረዋል።

በዚህ መሰረትም ሁለቱ መሪዎች ቱርክ ከሩሲያ ለመግዛት ባሰበችው ኤስ 400 ፀረ አውሮፕላን ሚሳኤልት እና በሶሪያ ቀውስ ዙሪያ መወያየታቸው ነው የተገለጸው።

የፕሬዚዳንት ኤርዶኸን ደጋፊ መሆናቸውን የገለጹት ትራምፕ፥ ፕሬዚዳንቱ ለስራ ጉብኝት አሜሪካ መምጣታቸው በሀገራቱ መካከል ያሉ ልዩነቶችን ለመፍታት መንገድ የሚከፍት መሆኑን አንስተዋል።

ፕሬዚዳንት ትራምፕ ቱርክ ኤስ-400 ሚሳኤልን ከሩሲያ መግዛቷ በአሜሪካ ላይ ከፍተኛ አሉታዊ ተፅዕኖ የሚያሳድር መሆኑን አብራርተዋል።

የሁለቱ ሀገራት ግንኙነት ቀጣይነት እንዲኖረውም አንካራ የግዥ እቅዷን እንድትሰርዝ አሳስበዋል።

ፕሬዚዳንት ኤርዶኻን በበኩላቸው ሀገራቸው ከሩሲያ ለመግዛት ባሰበችው የጦር መሳሪያ ምክንያት ከአሜሪካ ጋር የተፈጠረውን ውዝግብ በውይይት መፍታት እንደሚገባ ጠቁመዋል።

ሁለቱ መሪዎች በውይይታቸው በጉዳዩ ዙሪያ የተፈጠረውን አለመግባባት በሰለጠነ መንገድ በጠረጴዛ ዙሪያ ለመፍታት ስምምነት ላይ መድረሳቸው በዘገባው ተመላክቷል።

ከምድር ወደ አየር የሚወነጨፈው ኤስ 400 ሚሳኤል ከራዳር እይታ ውጭ መብረር የሚችሉትን እንደ ኤፍ 35 ያሉ ተዋጊ ጀቶችን ኢላማ ማድረግ እንደሚችል ይነገርለታል።

ምንጭ ፦ሬውተርስ

You might also like
Comments
Loading...