Fana: At a Speed of Life!

በዩኒቨርሲቲዎች የተከሰተውን ችግር በማነሳሳት የተጠረጠሩ ግለሰቦች በቁጥጥር ስር እየዋሉ ነው

አዲስ አበባ ፣ ህዳር 3 ፣ 2012 (ኤፍ ቢ ሲ) ከሰሞኑ በተወሰኑ ዩኒቨርሲቲዎች ላይ የተከሰተውን ችግር በማነሳሳት የተጠረጠሩ ግለሰቦች በተማሪዎች ጥቆማ በቁጥጥር ስር እየዋሉ መሆኑን የሳይንስና ከፍተኛ ትምህርት ሚኒስቴር ገለጸ።

ባሳለፍነው ቅዳሜ ምሽት በወልድያ ዩኒቨርሲቲ በሁለት ተማሪዎች መካከል የተፈጠረ የግል ፀብ ወደ ቡድን ግጭት አምርቶ የሁለት ተማሪዎች ህይወት መጥፋቱና የተወሰኑ ተማሪዎች ላይ ደግሞ ጉዳት መድረሱ ይታወሳል።

በተከታዮቹ ቀናትም መሰል ግጭቶች በሌሎች ዩኒቨርሲቲዎች መከሰታቸውን የሳይንስ እና ከፍተኛ ትምህርት ሚኒስቴር ገልጿል።

ከወልድያ ባሻገር መቱ፣ ጅማ እና መዳወላቡ ዩኒቨርሲቲዎች ችግር የተከሰተባቸው ዩኒቨርሲቲዎች መሆናቸውን፥ የሳይንስ እና ከፍተኛ ትምህርት ሚኒስትር ዲኤታው ዶክተር ሳሙኤል ክፍሌ ተናግረዋል።

ሚኒስትር ዲኤታው ችግሩን በማነሳሳት የተጠረጠሩ ሰዎችም ከትናንት ምሽት ጀምሮ በቁጥጥር ስር እየዋሉ ነው ብለዋል።

ከዚህ ጋር በተያያዘም ተማሪዎቹ ስጋት ስለገባቸው ከግቢ እየለቀቁ መውጣታቸውን ጠቅሰው፥ ከዛሬ ምሽት ጀምሮ ወደ ግቢያቸው እንዲመለሱ ይደረጋልም ነው ያሉት።

መንግስት ከሃይማኖት መሪዎች ጋር በመሆን የመማር ማስተማር ሂደቱ እንዳይቋረጥ ተማሪዎች ተረጋግተው እንዲማሩ እና ከተጠለሉባቸው የእምነት ተቋማት እንዲመለሱ እያደረገና እያወያያ መሆኑንም አስረድተዋል።

የተፈጠረው ችግር ከመንግስት የጸጥታ ሃይል አቅም በላይ አይደለም ያሉት ሚኒስትር ዲኤታው፥ ወላጆች የሚዲያ አካላት፣ የየአካባቢው ነዋሪዎች ተማሪዎቹን እንዲያረጋጉም ጠይቀዋል።

የተማሪዎችን መታወቂያ በመቀማትና ወደ ጊቢ በመግባት ችግሩን የሚፈጥሩ አካላት ከድርጊታቸው እንዲቆጠቡም አሳስበዋል።

 

 

በትእግስት አብርሃም

 

 

You might also like
Comments
Loading...