Fana: At a Speed of Life!

በባህር ዳር ከተማ የተገነባው የሳይንስ ካፌ ተመረቀ

አዲስ አበባ፣ጥቅምት 24፣2012 (ኤፍ ቢ ሲ) በአማራ ብሔራዊ ክልላዊ መንግስት ባህር ዳር ከተማ የተገነባው የሳይንስ ካፌ ተመርቆ ለአገልግሎት ዝግጁ ሆኗል።

በምርቃት ሰነ ስርዓቱ ላይ የኢኖቬሽንና ቴክኖሎጂ ሚኒስትር ዴኤታ ዶክተር  አህመዲን መሀመድን ጨምሮ የክልሉ ከፍተኛ የሥራ ሃላፊዎች ተገኝተዋል።

ማዕከሉ በውስጡ በተለያዩ የኢኖቬሽንና ቴክኖሎጂ ጉዳዮች ላይ ውይይት የሚደረግበት መለስተኛ የመወያያ ክፍል፣ የካፊቴርያ አገልግሎት እንዲሁም  የዲጅታልና ፊዚካል ቤተ መጽሃፍ የያዘ መሆኑ ተገልጿል።

ከዚህ ባለፈም የሳይንስ ካፌው ነጻ የኢንተርኔት አገልግሎትንና ሌሎች የሳይንስ አስተሳሰብን በማህበረሰብ ውስጥ ሊያሰርፁ የሚችሉ አሰራሮችን ያካተተ ነው ተብሏል።

የሳይንስ ካፌዎች የወጣቶችን የኢኖቬሽንና ቴክኖሎጂ ግንዛቤ ለመቅረጽ፣የሳይንስ ቴክኖሎጅና ኢኖቬሽን ባህልን ለማሳደግ፣አዳዲስ የፈጠራ ሀሳቦች ለማፍልቅና ለችግሮች ሳይንሳዊ መፍትሄን ለማፈላለግ የሚያግዙ ለውይይት ክፍት የሆኑ ማዕከላት ናቸው።

በዚህ መሰረትም በአማራ ብሔራዊ ክልላዊ መንግስት ተመርቆ ለአገልግሎት ዝግጁ ከመሆኑ የባህርዳሩ የሳይንስ ካፌ  በተጨማሪ  በደሴ፣ ደብረብርሀንና ጎንደር ከተሞች ተጨማሪ የሳይንስ ካፌዎች በመገንባት ላይ መሆኑን ከኢኖቬሽንና ቴክኖሎጂ ሚኒስቴር ያገኘነው መረጃ ያመላክታል።

በስነ ስርዓቱ ላይ ንግግር ያደረጉት የኢኖቬሽንና ቴክኖሎጂ ሚኒስትር ዴኤታ ዶክተር አህመዲን መሀመድ፥ማህበረሰቡን ከሳይንስ ቴክኖሎጂና ኢኖቬሽን ጋር ለማቀራረብ ይህንን መሰል ማዕከላት በማሳያነት በመስርያቤቱ ድጋፍ ተሰርተው በክልሎች የማስፋቱ ስራ ይሰራል ብለዋል።

የአማራ ክልል የሳይንስ ቴክኖሎጂና ኢንፎርሜሽን ኮሙዩኒኬሽን ኮሚሽን ኮሚሽነር ዶከተር ሰብስበው አጥቃው፥በክልሉ በሚገኙ ሌሎች ከተሞች በመገንባት ላይ ያሉት ማዕከላት ግንባታቸው 70 በመቶ አካባቢ መድረሱን ተናግረዋል።

ማዕከላቱ ሳቢና አዳዲስ የሆነ አስራሮችን በመፍጠር ወጣቶች ሳይሰላቹ የሳይንስ፣ የፈጠራና ቴክኖሎጂ ባህላቸውን እና አቅማቸውን እንዲያዳብሩ የሚያግዙ መሆናቸውንም አብራርተዋል።

You might also like
Comments
Loading...