Fana: At a Speed of Life!

በባህርዳርና አዲስ አበባ የተፈፀመው ጥቃት በብርጋዴር ጀኔራል አሳምነው ፅጌ የተመራ መፈቅለ መንግስት ሙከራ ነው -ፌዴራል ጠቅላይ አቃቤ ህግ

አዲስ አባበ፣ ህዳር 3፣ 2012 (ኤፍ.ቢ.ሲ) በባህርዳር እና አዲስ አበባ ከፍተኛ የመንግስት የስራ ሃላፊዎች ላይ የተፈፀሙት ጥቃቶች በብርጋዴር ጀኔራል አሳምነው ፅጌ የተመራ መፈንቅለ መንግስት ሙከራ መሆኑን የፌደራል ጠቅላይ ዓቃቤ ህግ አስታወቀ፡፡

የፌዴራል ጠቅላይ ዐቃቤ ህግ ሰኔ 15 በአማራ ክልል ርዕሰ መስተዳድርና የስራ ባልደረቦቻቸው እንዲሁም በቀድሞው የጦር ሃይሎች ጠቅላይ ኢታማዦር ሹም ጄኔራል ሰዓረ መኮንን ላይ የተፈፀመውን ጥቃት አስመልክቶ መግለጫ ሰጥቷል፡፡

በአማራ ክልል ሰኔ 15 ቀን 2011 ዓ.ም በርዕሰ መስተዳድር ዶክተር አምባቸው መኮንን፣ አቶ እዘዝ ዋሴ እና አቶ ምግባሩ ከበደ ላይ የተፈፀመው ጥቃት በብርጋዴር ጄኔራል አሳምነው ፅጌና ባልደረቦቻቸው ለመፈንቅለ መንግስት ተልዕኮ በተሰጣቸው አካላት የተፈፀመ መሆኑን በምርመራ ማረጋገጡን ጠቅላይ አቃቤ ህግ ብርሃኑ ፀጋዬ አስታውቀዋል፡፡

ብርጋዴር ጄኔራል አሳምነው ፅጌ እና ለመፈንቅለ መንግስት ተልዕኮ በተሰጣቸው አካላት ከክልሉ ልዩ ሃይል የተውጣጡ ሰዎች በክልሉ ርዕሰ መስተዳድር ፅህፈት ቤት ስብሰባ ላይ የነበሩትን ዶክተር አምባቸው መኮንን በጥይት በመደብደብ ህይወታቸው እንዲያልፍ አድርገዋል ብለዋል፡፡

እንዲሁም በአቶ እዘዝ ዋሴ ላይ በተመሳሳይ ጥቃት ህይወታቸውን እንዳለፈ ያነሱት ዐቃቤ ህጉ በወቅቱ ጥቃት የተፈፀመባቸው አቶ ምግባሩ ከበደም ህክምና ላይ በነበሩበት ወቅት ህይወታቸው እንዳለፈ ገልፀዋል፡፡

ጉዳዩን በሰው እና የሰነድ ማስረጃ ማረጋገጥ እንደተቻለ ነው ጠቅላይ ዐቃቤ ህጉ የተናገሩት፡፡

በዚህ ጥቃት የ15 ሰዎች ሞት፣ በ20 ሰዎች ላይ ደግሞ የአካል ጉዳት ማጋጠሙን ተናግረዋል።

እንዲሁም ከዚህ ጥቃት ጋር በተያያዘ 114 ክላሽንኮቭ ፣ ሶስት ብሬን እና ሌሎች መሳሪያዎች በቁጥጥር ስር ውለው የነበረ ሲሆን፥ ከጥቃቱ ጋር ቀጥተኛ ተሳትፎ የነበራቸው መሳሪያዎች ተለይተዋል ብለዋል፡፡

ከተጠርጣሪዎቹ መኖሪያ ቤት፣ መኪና፣ ፍላሽ ዲስክ እና ኮምፒውተሮች የተገኙ መረጃዎች በኤግዚቢትነት መያዛቸውንም ነው ጠቅላይ አቃቤ ህጉ የተናገሩት።

በአዲስ አበባ በቀድሞው የጦር ሃይሎች ጠቅላይ ኤታማዦር ሹም ጄኔራል ሰዓረ መኮንን እና ሜጄር ጄኔራል ገዛኢ አበራ ላይ የተፈፀመው ጥቃት በብርጋዴር ጀኔራል አሳምነው ፅጌ የተመራው መፈቅለ መንግስት ሙከራ አካል ነው ብለዋል፡፡

አላማው በጄኔራል ሰዓረ መኮንን ላይ ግድያ ከተፈፀመ በኋላ ጥቃቱን ተከትሎ በስፍራው ይገኛሉ ተብለው በተገመቱት የጦር ሃይሎች ምክትል ጠቅላይ ኤታማዦር ሹም ጄኔራል ብርሃኑ ጁላን በመግደል በሰራዊቱ ውስጥ መከፋፈል ለመፍጠር መሆኑ ተጠቁሟል፡፡

በዚህም በባህር ዳር በከፍተኛ ስራ ሃላፊዎች ላይ ግድያው ከተፈፀመ ከሰዓታት በኋላ ጄኔራል ሰዓረ መኮንን እና አብረዋቸው በነበሩት ሜጄር ጀኔራል ገዛኢ አበራ ላይ በግል ጠባቂያቸው ግድያ ሊፈፀም እንደቻለ ተጠቁሟል፡፡

ይህ ጥቃት ከሚያዚያ ወር 2011 ዓ.ም ጀምሮ ዝግጅት ሲደረግበት እንደነበረ በምርመራው መረጋገጡን የተናገሩት ጠቅላይ አቃቤ ህጉ፥ በብርጋዴር ጄኔራል አሳምነው ፅጌ እና በአክቲቪስቶች ዝግጅት የተካሄደበት ነው ብለዋል፡፡

ለተፈጸመው ጥቃት ሰዎች ከተለያዩ አካባቢዎች መመልመላቸውን ጠቁመው፥ ስልጠናና ስምሪት ተሰጥቷቸው መሳተፋቸውንም አንስተዋል።

ከዚህ ውስጥ በስነ ምግባርና መሰል ሁኔታዎች ከሀገር መከላከያ ሠራዊትና ከሌሎች የፀጥታ መዋቅር የተሰናበቱ አባላት እንደተመለመሉም አስረድተዋል።

ከዚህ ጥቃት ጋር በተያያዘ በባህር ዳር 277 እንዲሁም 140 ተጠርጣሪዎች አዲስ አበባ ላይ በቁጥጥር ስር ውለው እንደነበር ተናግረዋል፡፡

በተጨማሪም እንዲያዙ ማዘዣ ከወጣባቸው 70 ግለሰቦች ውስጥ 31 በቁጥጥር ስር መዋላቸውን ገልጸዋል፤ በ55ቱ ላይም ክስ እንደሚመሰረትባቸው በመጥቀስ።

ከጥቃቱ ጋር በተያያዘ ተሳትፎ አድርገዋል የተባሉ 22 ተጠርጣሪዎች የባንክ ሂሳብም እንዲዘጋ ተደርጓል ነው ያሉት።

በእነዚህ ላይ በተካሄደው ምርመራም ከባህር ዳሩ 45ቱ የወንጀል ተሳትፏቸው አነስተኛ መሆኑን ተከትሎ በምስክርነት ተለይተዋል ተብሏል፡፡

ከአዲስ አበባዎቹ 140 ተጠርጣሪዎች 61ዱ በዋስትና መፈታታቸውን የገለፁት ጠቅላይ ዓቃቤ ህጉ 5ቱ ደግሞ ከመፈንቅለ መንግስቱ ሙከራ ውጭ ከጦር መሳሪያ ዝውውር ጋር በተያያዘ ጉዳያቸው እንደተያዘ ተጠቁሟል፡፡

በአሁኑ ወቅት የሰነድና የሰው ማስረጃ የተጠናቀቀባቸው ከባህርዳር 55 እና ከአዲስ አበባ 23 ተጠርጣሪዎች ላይ ክስ ለመመስረት ዝግጅት መጠናቀቁን ዓቃቤ ህጉ ተናግረዋል፡፡

በተጠርጣሪዎቹ ላይም ክስ በያዝነው ሳምንት ይመሰረታል ብለዋል።

You might also like
Comments
Loading...