Fana: At a Speed of Life!

በመጀመሪያ ዲግሪ ከዩኒቨርሲቲ ለመመረቅ የተቃረበው የ9 ዓመቱ ታዳጊ

አዲስ አበባ፣ ህዳር 17፣ 2012 (ኤፍ.ቢ.ሲ) ላውረንት ሲመን ይባላል የ9 ዓመት ታዳጊ ሲሆን፥ ልክ እንደ እኩዮቹ ጌም መጫወት፣ ጉዞ መጓዝ እና የማህበራዊ ትስስር ድረ ገጾችን መጠቀምን ያዘወትራል።

ቤልጂዬማዊው ታዳጊ ወደ ትምህርት ገበታው ሲመለስ ግን በእድሜ ከእሱ በአስር ዓመታት የሚበልጡት እንኳ አይደርሱበትም ተብሏል።

ሁሉም ነገር በእቅድ መሰረት ከሄደ እና ላውረንት የመመረቂያ ፕሮጀክቱን ካጠናቀቀም የፊታችን ታህሳስ ወር ላይ ኔዘርላንድ ከሚገኘው ኤንድሆቨን የቴክኖሎጂ ዩኒቨርሲቲ በኤሌክትሪካል ኢንጂነሪንግ ዲግሪውን ያገኛል ተብሏል።

በሀገሪቱ በርካታ ተማሪዎች መሰል የትምህርት አይነቶችን ለማጠናቀቅ እስከ 3 ዓመት የሚፈጅባቸው ቢሆንም፥ ታዳጊው ላውረንት ግን ይህንን ለማሳካት 3 ዓመታትን ለመጠበቅ አልተገደደም።

የ9 ዓመቱ ታዳጊ ላውረንት ባሳለፍነው ዓመት የዩኒቨርሲቲ ትምህርቱን የጀመረ ሲሆን፥ አጠቃላይ ትምህርቱን ለማጠናቀቅም 10 ወራት ብቻ ነው የፈጀበት መሆኑ ተገልጿል።

ይህ የሆነውም የዩኒቨርሲቲ መምህራኑ የልጁ ትምህርት የመቀበል አቅምን ተመልክተው በፍጥነት ወደ ቀጣይ ትምህርት እንዲያልፍ በማድረጋቸው መሆኑም ተነግሯል።

ላውረንት የመጀመሪያ ደረጃ ትምህርቱን የ4 ዓመት ልጅ እያለ መጀመሩን የሚናገሩት ወላጆቹ፥ በስድስት ዓመቱ ወደ ሁለተኛ ደረጃ ትምህርት ቤት መግባቱን ገልጸዋል።

የ9 ዓመቱ ታዳጊ ላውረንት የፊታችን ታህሳስ ወርላይ በኤሌክትሪካል ኢንጂነሪንግ ከተመረቀ በኋላ፤ የህክምና ትምህርት ቀጥሎ መከታተል እንደሚፈልግ ተናግሯል።

ምንጭ፦ www.odditycentral.com

You might also like
Comments
Loading...