Fana: At a Speed of Life!

በመዲናዋ እየታየ ያለውን ህገ-ወጥ የመሬት ወረራ ለማስቆም በትኩረት እንደሚሰራ ተገለፀ

አዲስ አበባ፣ ጥቅምት 27፣2012 (ኤፍ ቢሲ) በአዲስ አበባ ከተማ እየታየ ያለውን ህገ-ወጥ የመሬት ወረራ ማስቆም የከተማ አስተዳደሩ ቀጣይ የትኩረት አቅጣጫ መሆኑ ተገልጿል።

በአዲስ አበባ ከተማ አስተዳደር ሲካሄድ የቆየው የፈጻሚ መስሪያ ቤቶች የሩብ አመት አፈጻጸም ግምገማ በዛሬው ዕለት ተጠናቋል።

በመጨረሻው ቀን ግምገማ መርሀግብር ኢንጂር ታከለ ኡማና የአዲስ አበባ የኢህአዴግ ፅህፈትቤት ኃላፊ አቶ ተስፋዬ በልጅጌ ተገኝተዋል።

በከተማ አስተዳደሩ በሩብ አመቱ በተለያየ ዘርፍ የተሰሩ ስራዎች ክፍተታቸውና ጠንካራ ጎናቸውን በመለየት የመፍትሄ ሀሳቦች ተቀምጠዋል።

ኢንጂር ታከለ ኡማ በሩብ አመቱ በትምህርትና መሰረተ ልማት ዝርጋታዎች የተሻሉ አፈጻጸሞች መታየታቸውን አንስተዋል።

በቀጣይ ጊዜያትም በከተማዋ ጥራታቸው ከፍ ያለ ቁጥራቸው የበዛ ፕሮጀክቶች እንደሚጀመሩ ኢንጂር ታከለ ተናግረዋል።

በከተማዋ እየታየ ያለው ህገ-ወጥ የመሬት ወረራ ማስቆም የከተማ አስተዳደሩ ቀጣይ በትኩረት የሚሰራ መሆኑንም ጠቁመዋል።

በመሀል ከተማም ጭምር እየታየ ያለው ህገወጥ የመሬት ወረራ በጥቂት ጊዜያት መፍትሄ ያገኛል ብለዋል።

የከተማ አስተዳደሩ አዲስ አበባን በአዲስ መልክ የመገንባቱ ስራ ተጠናክሮ እንደሚቀጥል መናገራቸውንም ከከንቲባ ፅህፈት ቤት ያገኘነው መረጃ ያመላክታል።

You might also like
Comments
Loading...