Fana: At a Speed of Life!

ራሱን ችሎ እንጀራ የሚጋግር ሮቦት የሰራው የ9ኛ ክፍል ተማሪ

አዲስ አበባ፣ ህዳር 19፣ 2012 (ኤፍ ቢ ሲ) የ9ኛ ክፍል ተማሪው ያለሰው ረዳት እንጀራ መጋገር የሚችል ሮቦት ሰርቶ ለእይታ አቅርቧል።

ነዋሪነቱ በአማራ ክልል ሰሜን ሸዋ ዞን ሞረትና ጅሩ ወረዳ እነዋሪ ከተማ የሆነው ተማሪ ዳዊት አድማሱ ያለሰው ረዳት እንጀራ መጋገር የሚችል ሮቦት ሰርቶ ማቅረቡ ተነግሯል።

ተማሪ ዳዊት ሮቦቱን ለመስራት ምጣድ፣ ላሜራ፣ ”ዜድ” ብረት፣ የኤሌክትሪክ አስተላላፊ (ኮንዳክተር)፣ ፓምፕ፣ ዲናሞ እና ሽቦ መጠቀሙን ተናግሯል።

ተማሪው የሰራው ሮቦት ቤት ውስጥ እንጀራ ለመጋገር ያለውን እንግልትና ድካም የሚያቃልል ሲሆን፥ እንጀራ ለመጋገር የሚያስፈልጉ ሂደቶችን ያለማንም እርዳታ ያከናውናል።

ሮቦቱ የጤፍ ዱቄትን ከማቡካት ጀምሮ አብሲት መጣልና ሌሎች አስፈላጊ ተግባራትን፥ በተገጠመለት ምጣድ ለክቶ መጋገርንና በመጨረሻም የተጋገረውን እንጀራ ከምጣድ ማውጣትን ድጋፍ ሳያስፈልገው ማከናወን እንዲችል ተደርጎ የተሠራ ነው ተብሏል።

ማሽኑ በ”ሴንሰር” ቴክኖሎጂ በራሱ ጊዜ ምላሽ እንዲሰጥ ሆኖ የተሠራ ሲሆን፥ መሳሪያው “ሁሉን አቀፍ” የሚል ስያሜ ተሰጥቶታል።

እንጀራ ከመጋገር በተጨማሪም የዳቦ መጋገሪያና ሻይ ማፍያም ተገጥሞለታል።

ተማሪ ዳዊት የሮቦቱን ንድፍ ማዘጋጀቱን ገልጾ የገንዘብ እጥረት ከተቃለለት ወደፊት ሮቦቱን አሻሽሎ ለገበያ የማቅረብ ሐሳብ አለኝ ብሏል።

በቀጣይ የጫማ አስዋቢዎችን (ሊስትሮ) ድካም የሚያስቀር የፈጠራ ሥራየን አቀርባለሁ ማለቱን ከአማራ ብዙሃን መገናኛ ድርጅት ያገኘነው መረጃ ያመላክታል።

You might also like
Comments
Loading...