Fana: At a Speed of Life!

ም/ርዕሰ መስተዳድር አቶ ርስቱ በኢትዮጵያ የአሜሪካ አምባሳደር ማይክል ራይነር ጋር ተወያዩ

አዲስ አበባ፣ ጥቅምት 27፣2012 (ኤፍ ቢ ሲ) የደቡብ ክልል ምክትል ርዕሰ መስተዳድር አቶ ርስቱ ይርዳው በኢትዮጵያ የአሜሪካ አምባሳደር ማይክል ራይነር ጋር በዛሬው ዕለት ተወያይተዋል።

ማይክል ራይነር ከምክክር መድረኩ በኋላ ለጋዜጠኞች በሰጡት መግለጫ፥ ከክልሉ ጋር የነበረውን ግንኙነት ማጠናከር በሚቻልበት ሁኔታ ላይ መወያየታቸውን ተናግረዋል።

በተለይም በትምህርት፣ በስራ እድል ፈጠራ እና የአርብቶ አደሮችን ህይወት ማሻሻል በሚቻልባቸው መንገዶች ዙሪያ በትኩረት መምከራቸውን አብራርተዋል።

የግል ሴክተሩን ማጠናከር ለሀገር ብልፅግና ትልቅ አስተዋፅኦ ያለው መሆኑን ያነሱት ማይክል ራይነር፥ በክልሉ ዘርፉን ለማጠናከር እየተሰራ ያለው ስራ አበረታች መሆኑን ጠቁመዋል።

ሀገራቸውም በቀጣይ በክልሉ በሁሉም ዘርፎች ለሚደረገው እንቅስቃሴ የምታደርገውን ሁለንተናዊ ድጋፍ አጠናክራ እንደምትቀጥልም አረጋግጠዋል።

የአሜሪካ መንግሥት ለደቡብ ክልል የሰብዓዊ ዕርዳታ ስራዎች ድጋፍ እንደሚያደርግ የገለጹት አምባሳደሩ፥ ሰላምና የህግ የበላይነትን በማስጠበቅ በኩልም ድጋፉን አጠናክሮ እንደሚቀጥል ጠቁመዋል፡፡

 

በአፈወርቅ አለሙ እና ሶዶ ለማ

You might also like
Comments
Loading...