Fana: At a Speed of Life!

መንግስት ዜጎችን ከጥቃት ለመታደግ የሚያሳየው ትዕግስት ልክና ገደብ ሊኖረው ይገባል-የሃይማኖት መሪዎች

አዲስ አበባ፣ ህዳር 4፣ 2012 (ኤ ፍ ቢ ሲ) መንግስት በአሁኑ ወቅት በሀገሪቱ በዜጎች ላይ የሚደርሰውን ጥቃት ለመከላከል የሚያሳየው ትዕግስት ልክና ገደብ ሊኖረው እንደሚገባ የሃይማኖት መሪዎች አሳስበዋል።

የፌዴሬሽን ምክር ቤት በወቅታዊ ጉዳዮች ዙሪያ ከሃይማኖት መሪዎች ጋር ውይይት እያካሄደ ነው።

በውይይት መድረኩ የፌደሬሽን ምክርቤት አፈ ጉባኤ ወይዘሮ ኬሪያ ኢብራሂምን ጨምሮ ከተለያዩ የሃያማኖት ተቋማት የተውጣጡ የሃይማኖት መሪዎች ተሳትፈዋል።

በውይይቱ ኢትዮጵያ በአሁኑ ወቅት ያለችበት ሁኔታ በሀገር ውስጥም ሆነ ከሀገር ውጭ የሚኖሩ ዜጎችን በእጅጉ እያሳሰበ መሆኑ ተመላክቷል።

በዚህም በተለያዩ አካባቢዎች በሚቀሰቀሱ ግጭቶች ምክንያት የሰዎች ህይወት እየጠፋ እና ቤተ እምነቶች እየተቃጠሉ መሆኑ ነው የተገለፀው።

ስለሆነም በዜጎች መካከል የነበረውን አብሮ የመኖር፣ የመተሳሰብ እና የመቻቻል እሴቶች ለማጠናከር ሁሉም ባለድርሻ አካላት የበኩላቸውን ሚና ሊወጡ እንደሚገባ የሃማኖት መሪዎቹ አሳስበዋል።

በዜጎች ላይ ብሎም በቤተ እምነቶች ላይ እየደረሰ ያለውን ጥቃት ለመቆጣጠርም መንግሰት በጥፋት ሃይሎች ላይ እርምጃ ለመውሰድ የሚያሳየው ትዕግስት ልክ እና ገደብ ሊኖረው እንደሚገባም ጠቁመዋል።

በህዝቦች መካከል ልዩነት በመፍጠር በዜጎች ህይወት ላይ እየተጫወቱ የሚገኙ አካላት ላይ የማያዳግም እርምጃ መወሰድ ይገባልም ነው ያሉት።

በአሁኑ ወቅት በአንዳንድ አካባቢዎች የሚስተዋለውን የፀጥታ ችግር ለመፍታትና ሁኔታዎችን ወደነበሩበት ለመመለስ እና ዜጎች በነፃነት ተንቀሳቅሰው የመስራት እና የመኖር መብታቸውን ለማስከበር መንግስት ከሚመለከታቸው አካላት ጋር በቅንጅት በመስራት የህግ የበላይነትን ማስከበር እንደሚገባው ም አጽንኦት ሰጥተዋል።

የፌደሬሽን ምክርቤት አፈ ጉባኤ ወይዘሮ ኬሪያ ኢብራሂም በበኩላቸው፥ ምክር ቤቱ ከፈታችን ህዳር 6 ቀን ጀምሮ ለአንድ ወር የሚቀጥል ሀገር አቀፍ የህዝብ ለህዝብ ግንኙነት ማጠናከሪያ መድረክ የሚያካሂድ መሆኑን ተናግረዋል።

በዚህም በአሁኑ ወቅት በተለያዩ የሀገሪቱ አካባቢዎች የተፈጠሩ ግጭቶችን በመፍታት የህዝቦችን አንድነትና መተሳሳብ ለማጠናከር የሚሰራ መሆኑን ጠቁመዋል።

የሃይማኖት መሪዎችም ለእየ እምነት ለተከታዮቻቸው ባገኙት አጋጣሚ ሁሉ ስለሰላም እና አንድነት እንዲሁም መቻቻል አስፈላጊነት ዙሪያ ግንዛቤ እንዲሰጡ ጥሪ አቅርበዋል።

በመሃመድ አሊ

You might also like
Comments
Loading...