Fana: At a Speed of Life!

ለህዳሴ ግድብ የህብረተሰቡ ተሳትፎ ተጠናክሮ ከቀጠለ በወር እስከ 100 ሚሊየን ብር መሰብሰብ እንደሚቻል ተገለፀ

አዲስ አበባ፣ ጥቅምት 28፣ 2012 (ኤፍ ቢ ሲ) ለታላቁ የኢትዮጵያ ህዳሴ ግድብ በ2012 ዓ.ም የመጀመሪያ ሩብ አመት በህብረተሰቡ ተሳትፎ 168 ሚሊየን 953 ሺህ ብር ገቢ መገኘቱን የታላቁ የኢትዮጵያ ህዳሴ ግድብ ህዝባዊ ተሳትፎ አስተባባሪ ብሔራዊ ምክር ቤት ጽህፈት ቤት አስታወቀ።

ጽህፈት ቤቱ ዛሬ በግድቡ ዙሪያ ያለውን የህብረተሰብ ተሳትፎ አስመልክቶ ጋዜጣዊ መግለጫ ሰጥቷል።

የማስተባበሪያ ጽህፈት ቤቱ የኮሙዩኒኬሽን ዳይሬክተር አቶ ኃይሉ አብርሃም፥ የህዳሴ ግድቡ ግንባታ በጥሩ አፈፃፀም ላይ እንደሚገኝና የህብረተሰቡ ተሳትፎም ተጠናክሮ መቀጠሉን ገልጸዋል።

በአሁኑ ወቅት የግድቡ ጉዳይ ሃገራዊ ብቻ ሳይሆን አህጉራዊና ዓለም አቀፋዊ መነጋገሪያ አጀንዳ እየሆነ መምጣቱንም ነው የተናገሩት።

በተለይም ከወቅቱ የግብፅ ሁኔታ ጋር በተያያዘ በሁሉም የሀገሪቷ አቅጣጫዎች የሚገኙ ህዝቦች ተሳትፎ ዳግም በማንሰራራት ላይ እንደሚገኝና ድጋፋቸውን አጠናክረው እየቀጠሉ መሆኑኑንም ጠቅሰዋል።

በዚህም ለታላቁ የኢትዮጵያ ህዳሴ ግድብ በ2012 ዓ.ም የመጀመሪያ ሩብ ዓመት ብቻ በህብረተሰቡ ተሳትፎ ከቦንድ ግዢ 168 ሚሊየን 953 ሺህ ብር ገቢ መገኘቱን አስታውቋል።

የህብረተሰቡ ተሳትፎ በዚሁ ተጠናክሮ የሚቀጥል ከሆነም በወር እስከ 100 ሚሊየን ብር መሰብሰብ የሚያስችል ሁኔታ መኖሩን መግለፃቸውን ኢዜአ ዘግቧል፡፡

You might also like
Comments
Loading...