Fana: At a Speed of Life!

ህዝበ ሙስሊሙ የመውሊድ በዓልን በመከባበር እንዲያሳልፈው ጥሪ ቀረበ

አዲስ አበባ ፣ ጥቅምት 27 ፣ 2012 (ኤፍ ቢ ሲ) የኢትዮጵያ እስልምና ጉዳዮች ጠቅላይ ምክር ቤት ህዝበ ሙስሊሙ የመውሊድ በዓልን በመከባበር እንዲያሳልፈው ጥሪ አቀረበ።

ምክር ቤቱ ለ1 ሺህ 494ኛው የነብዩ ሙሀመድ ልደት (መውሊድ) በዓል የእንኳን አደረሳችሁ መልዕክቱን አስተላልፏል።

የነብዩ ሙሀመድ የልደት በዓል የሰላም፣ የፍቅር፣ የአንድነትና የወንድማማችነት የብስራት ደወል በምድር ላይ የተሰማበት ዕለት መሆኑን ገልጿል።

ነብዩ ሙሀመድ “የአላህን” አንድነት ያስተማሩና ህዝባቸውን በወንድማማችነት ያስተሳሰሩ የአንድነትና የፍቅር ነብይ መሆናቸውንም ምክር ቤቱ ጠቅሷል።

“በአላህ” አንድነትና በመጨረሻው ቀን ማመንን መሠረት በማድረግም ከጌታቸው የተሰጣቸውን በመልካም የማዘዝና ከመጥፎ የመከልከል ተልዕኮ በማሳካት በመልካም ስነ ምግባር የታነጸ ማህበረሰብ መመስረታቸውንም አንስቷል።

መውሊድ ተራርቀው የሚኖሩ መሻኢኮች የሚገናኙበት፣ ደረሶችና ምስኪኖች ሶደቃ የሚቃመሱበት፣ ህዝበ ሙስሊሙ ስለ እምነቱ ምክር የሚወስድበት፣ ሙስሊም ከሙስሊም ብቻ ሳይሆን ከክርስቲያኑ ጋር የሚተሳሰርበትና ለሀገር ሰላምና አንድነት ዱዓ የሚደረግበት፣ “የአላህ” ምህረት የሚከጀልበት ታላቅ መድረክ መሆኑንም አውስቷል።

በመሆኑም ካጋጠመን ወቅታዊ ችግር በሰላም፣ በፍቅርና በአንድነት እንወጣ ዘንድ መውሊድ በውዴታ የሚከበር በዓል እንደመሆኑ በዓሉን በመከባበር ማሳለፍ ይገባልም ብሏል።

ሀገራችንን ሰላም ያደርግልን ዘንድም “አላህን” መለመን እንደሚገባ በመጥቀስም በዓሉ የሰላም፣ የፍቅርና የአንድነት ይሆን ዘንድ መልካም ምኞቱን ገልጿል።

በተያያዘም ከፌደራል መጅሊስ ጀምሮ የክልለና የከተማ መስተዳድር መጅሊስ ምክር ቤቶችን የማዋቀር ሂደቱ ሁሉንም የክልልና የከተማ መስተዳድር መጅሊስ ምክር ቤቶችን የሚመለከት መሆኑን ያነሳው ምክር ቤቱ፥ ሥርዓትን በጠበቀ እና ሠላምን በማያናጋ አኳኋን እየተሠራ መሆኑ አስታውሷል።

እስካሁንም የኦሮሚያ፣ የደቡብ እና የአዲስ አበባ ከተማ መስተዳድር ሶስት መጅሊሶች መዋቀራቸውንና የቀሩት ክልሎች በተያዘላቸው ዕቅድ መሠረት ይዋቀራሉ ማለቱን ከምክር ቤቱ ያገኘነው መረጃ ያመላክታል።

በመሆኑም ማዕከልን ባልጠበቀ አኳኋን የመጅሊስ ምክር ቤቶችን እና መስጅዶችን መንጠቅ፣ በከተሞች ኢማሞችንና ሙአዚኖችን እንዲሁም በገጠር መሻኢኮችንና ሙደሪሶችን በማስከፋት ከሥራ የማፈናቀል ድርጊት በፍፁም ተቀባይነት እንደሌለው በማንሳት ህዝበ ሙስሊሙ ከመሰል ድርጊት እንዲቀጠብም ጥሪውን አስተላልፏል።

 

 

You might also like
Comments
Loading...