Fana: At a Speed of Life!

ሀገራቱ የህዳሴ ግድብን በተመለከተ እኩል ተጠቃሚ የሚያደርግ ስምምነት ላይ ለመድረስ ቁርጠኛነታቸውን አረጋገጡ

አዲስ አበባ ፣ ጥቅምት 27፣ 2012 (ኤፍ ቢ ሲ) በዋሽንግተን የተወያዩት የኢትዮጵያ፣ ሱዳን እና ግብፅ የውጭ ጉዳይ ሚኒስትሮች የህዳሴ ግድብን የውሃ አሞላልና ኦፕሬሽንን በተመለከተ ሁሉን አቀፍ፣ ዘላቂ እና ሁሉንም ወገን ተጠቃሚ የሚያደርግ ስምምነት ላይ ለመድረስ ቁርጠኛነታቸውን አረጋገጡ።

ሚኒስትሮቹ የአሜሪካ የገንዘብ ሚኒስትር እና የዓለም ባንክ ፕሬዚዳንት በተገኙበት ተወያይተዋል።

በውይይታቸውም ሶስቱ ሀገራት በአውሮፓውያኑ 2015 ላይ በካርቱም የደረሱትን ስምምት ተፈፃሚ ለማድረግ ግልፅ ሂደትን ለማስቀመጥ ተስማምተዋል።

በተጨማሪም በውሃ ሚኒስትሮች ደረጃ አራት ስብሰባዎችን ለማካሄድም ተግባብተዋል።

በእነዚህ ስብሰባዎች አሜሪካ እና ዓለም ባንክ በታዛቢነት የሚሳተፉ ይሆናል።

እስከ አውሮፓውያኑ ጥር 15 ቀን 2020 ድረስም ስምምነት ላይ ለመድረስ የተግባቡ ሲሆን፥ የስምምነቱን አፈፃፀም ለመገምገምና ለመደገፍ ሁለት ስብሰባዎችን በዋሽንግተን ለማከናወን ከስምምነት ደርሰዋል።

እስከ ጥር 15 ቀን 2020 ድረስ ከስምምነት መድረስ ከተሳናቸውም በካርቱም የተደረሰው የመግባቢያ ስምምነት አንቀፅ 10ን ወደተግባር ለመቀየር ነው የውጭ ጉዳይ ሚኒስትሮቹ የተስማሙት።

በመጨረሻም ሚኒስትሮቹ የአባይ ወንዝ ለሶስቱም ሀገራት ህዝቦች ልማት አስፈላጊ መሆኑን በማመን ድንበር ተሻጋሪ ትብብር የማድረግ አስፈላጊነት ላይ ተስማምተዋል።

ከውይይቱ ቀደም ብሎም የኢ.ፌ.ዴ.ሪ የውጭ ጉዳይ ሚኒስትር አቶ ገዱ አንዳርጋቸው ከሱዳንና ከግብጽ አቻዎቻቸው ጋር በመሆን በኋይት ሀውስ ከፕሬዚዳንት ዶናልድ ትራምፕ ጋር ተወያይተዋል።

You might also like
Comments
Loading...