Fana: At a Speed of Life!

የአፍሪካ-ሩሲያ የኢኮኖሚ ፎረም እየተካሄደ ነው

አዲስ አበባ፣ ጥቅምት 12፣ 2012 (ኤፍ ቢ ሲ) ጠቅላይ ሚኒስትር ዶክተር አብይ አህመድ የሚሳተፉበት የአፍሪካ ሩሲያ ኢኮኖሚ ፎረምበሩሲያ ሶቺ ከተማ እየተካሄደ ነው።

ዛሬ እና ነገ በሚካሄደው በዚህ የኢኮኖሚ ፎረም ላይ ከ35 በላይ የአፍሪካ ሀገራት መሪዎች እየተሳተፉ ይገኛል።

የአፍሪካ መሪዎች የሚገኙበት እና የተለያዩ ተቋማትና ድርጅቶች አመራሮች የሚሳተፉበት ይህ ፎረም በአፍሪካ ሩሲያ ግንኙነት ታሪክ ውስጥ የመጀመሪያው ነው ተብሏል።

በዚህ ፎረም ላይ በበርካታ ዓለም አቀፍ ጉዳዮች ላይ ሰፊ ውይይት እንደሚደረግ የሚጠበቅ ሲሆን፥ አስቸኳይ እርምጃ በሚያስፈልጓቸው የአፍሪካ ሩሲያ የጋራ ጉዳዮች ላይ ምክክር ይደረጋል።

የአፍሪካ ሩሲያ ግንኙነት ያለበትን ደረጃ፣ በፓለቲካው ዘርፍ ያለው ግንኙነት፣ በኢኮኖሚ፣ በሰብዓዊ ድጋፍ እና በባህላዊ ዘርፎች አፍሪካና ሩሲያ ያላቸው ትብብር በውይይቱ ይዳሰሳል።

መድረኩ ዘርፈ ብዙውን የአፍሪካ ሩሲያ ግንኙነት ለማሳደግና ለማፋጠን የሚያስችሉ መንገዶች የሚለዩበትም ነው ተብሏል።

በተጨማሪም ሽብርተኝነትን፣ ድንበር ተሻጋሪ ወንጀሎችን እና ሌሎች ለአካባቢውም ሆነ ለዓለም አቀፉ ማህበረሰብ አስቸጋሪና ስጋት በሆኑ ጉዳዮች ላይ የሃሳብ ልውውጥ ይደረጋል ተብሏል።

ከዚህ ባለፈም በፎረሙ ላይ በሩሲያ እና በአፍሪካ ሃገራት መካከል የተለያዩ የመግባቢያ ስምምነቶች ይፈጸማሉ ተብሎ ይጠበቃል።

ፎረሙ የሩሲያ አፍሪካ ግንኙነትን ወደ ተሻለ ደረጃ ከፍ ለማድረግ ምቹ መደላድል የሚፈጠርበት መሆኑን በመድረኩ ላይ ተገልጿል።

You might also like
Comments
Loading...