Fana: At a Speed of Life!

12ኛው የሰንደቅ ዓላማ ቀን ተከበረ

አዲስ አበባ፣ ጥቅምት 3፣ 2012 (ኤፍ.ቢ.ሲ) 12ኛው የሰንደቅ ዓላማ ቀን በዛሬው እለት በተለየታዩ ስነ ስርዓቶች ተከበረ ።

የሰንደቅ ዓላማ ቀኑ “ሰንደቅ አላማችን የብዝሀነታችን ድምር ውጤትና የአንድነታችን ምሰሶ ነው” በሚል መሪ ቃል ነው በተለያዩ የሀገሪቲ ክፍሎች የተከበረው።

በስነ ስርዓቱ ላይ በአዲስ አበባ ከተማ በኢፌዴሪ የህዝብ ተወካዮች ምክር ቤት ቅጥር ግቢ ውስጥ የኢፌዴሪ ፕሬዚዳንት ሳህለወርቅ ዘውዴ፣ የህዝብ ተወካዮች ምክር ቤት ምክትል አፈ ጉባዔ ወይዘሮ ሽታዬ ምናለ እና የፌደራል ጠቅላይ ፍድር ቤት ፕሬዚዳንት ወይዘሮ መአዛ አሸናፊን ጨምሮ የምክር ቤቱ አባላት ተገኝተዋል።

ከዚህ በተጨማሪም በዓሉ በኦሮሚያ ክልል በጨፌ ኦሮሚያ እንዲሁም በትግራይ ክልል መቐለ ከተማ በተለያዩ መርሃ ግብሮች ተከብሯል።

የኢፌዴሪ የህዝብ ተወካዮች ምክር ቤት ባወጣው መግለጫ፥ ብሄራዊ የሰንደቅ ዓላማ ቀን በኢፌዴሪ ህገ-መንግስት አንቀፅ 3 የተቀመጠውን የብሔራዊ ሰንደቅ ዓላማ ትርጓሜ መሰረት በማድረግ የወጣ የሰንደቅ ዓላማ አዋጅ ቁጥር 654/2001 እንዲሁም በተሻሻለው አዋጅ ቁጥር 863/2006 አንቀጽ 2 መሰረት በየዓመቱ ጥቅምት ወር በመጀመሪያው ሳምንት ሰኞ እንዲከበር ተደንግጓል።

በመሆኑም የአዋጁን ዓላማ ለማሳካት የሰንደቅ ዓላማ ቀን በዓል በተለያየ መልኩ እየተከበረ እነሆ አስራ ሁለት ዓመታትን አስቆጥሮ ከአገራዊ የለውጥ ምዕራፍም ደርሷል ብሏል በመግለጫው።

ባለፋት ረዥም ዓመታት ለዴሞክራሲያዊ ስርዓት ግንባታ እና ለሀገሪቱ ነፃነት የተደረጉ ትግሎች የሪፐብሊኩን ሰንደቅ ዓላማ የሉዓላዊነት መገለጫና ለህዝቦች ዲሞክራሲያዊ አንድነት ምልክት መሆኑ ላይ ሰፊ የግንዛቤ ሥራ መሰራቱንም አስታውቋል።

የሰንደቅ ዓላማ ቀን በየዓመቱ ሲከበርም በሪፐብሊኩ ስንደቅ ዓላማ ዙሪያ ጥናቶች እየቀረቡ ግልጽነት እንዲፈጠር መንግስት ማስተባበሩን የገለፀው ምክር ቤቱ፥ ሰንደቅ ዓላማው የሉዓላዊነት መገለጫና ለህዝቦች ዲሞክራሲያዊ አንድነት ምልክት መሆኑ ላይ የጎላ ልዩነት ባይኖርም በዓርማው ላይ ግን በሚፈለገው ደረጃ ብሔራዊ መግባባት መፍጠር የተቻለ አለመሆኑን ይታወቃል ብሏል።

እንዲህ ዓይነት ልዩነቶች ሲኖሩ በህጋዊና ዴሞክራሲያዊ መንገድ ከሕዝብ ጋር በሚኖር ውይይት የሚነሱት ጥያቄዎች እየተመለሱና መግባባት እየተፈጠረባቸው እንደሚሄድ ይጠበቃል።

የዘንድሮ የሰንደቅ ዓላማ ቀን በዓል መከበር የሚነሱትን የተለያዩ ጥያቄዎች ለህዝብ በማቅረብ በለውጡ ሂደት ላይ ተቀራራቢ ግንዛቤ ለመፍጠር ያግዛል ያለው ምክር ቤቱ፥ በህገመንግስታዊ ስርዓት በምትተዳደር ሀገር ውስጥ የሚንቀሳቀሱ የፖለቲካ ፖርቲዎችና ደጋፊዎቻቸው የጋራ በሚያደርጉ ሀገራዊ እሴቶች ላይ እንዲወያዩ እድል ይሰጣልም ብሏል።

እንዲሁም የሀገሪቱ ዜጎች በልዩነት በሚያነሳቸው ጉዳዩች ላይ የተደራጀ ውሳኔ እስኪሰጥ ድረስ በህግ የጸደቀውን የሪፐብሊኩን ሰንደቅ ዓላማ በማክበር ላይ አቋም እንዲይዝ ማድረግም እንደሚያስችልም ምክር ቤቱ አስታውቋል።

You might also like
Comments
Loading...