Fana: At a Speed of Life!

ጠ/ ሚ ዶ/ር አብይ ከሩሲያው ፕሬዚዳንት ቭላድሚር ፑቲን ጋር ተወያዩ

አዲስ አበባ፣ ጥቅምት12፣ 2012 (ኤፍ ቢ ሲ) ጠቅላይ ሚኒስትር ዶክተር አብይ አሕመድ ከሩሲያው ፕሬዚዳንት ቭላድሚር ፑቲን ጋር ተወያዩ።
 
ጠቅላይ ሚኒስትር አብይ ሀገር በቀል የኢኮኖሚ መርሆችን በመተግበር በመጪዎቹ አስር አመታት ውስጥ ኢትዮጵያን በአፍሪካ አምስት ቀዳሚ ኢኮኖሚ ካላቸው ሀገራት ተርታ ለማሰለፍ እየተሰራ ነው ብለዋል።
 
በበሀገሪቱ እየተካሄደ ስላለው ሪፎርም ገለፃ ያደረጉት ጠቅላይ ሚኒስትሩ፥ ኢትዮጵያ ሉአላዊነቷን ለማስጠበቅ ባደረገችው ጦርነት ሩሲያ ለነበራት ድጋፍ ምስጋና አቅርበዋል።
 
የሩሲያው ፕሬዚዳንት ቭላድሜር ፑቲን በበኩላቸው በኢጋድ መሪነት ለምስራቅ አፍሪካ ሰላምና መረጋጋት ኢትዮጵያ እያደረገች ያለችውን ጥረት ያደነቁ ሲሆን፥ በተባበሩት መንግስታት ባለብዙ ዘርፍ መድረኮች ሀገራቱ አብረው እየሰሩ መሆኑን ገልፀዋል።
 

መሪዎቹ በመከላከያ፣ ትምህርት፣ የኒዩክለር ቴክኖሎጂን ለሰላማዊ ግልጋሎት መጠቀም በሚቻልበት ሁኔታላይ በማተኮር ውይይት አድርገዋል፡፡

 
እንዲሁም በሁለቱ ሀገራት መካከል ስላለው የንግድ ግንኙነት እንዲሁም በኢትዮጵያና ሩሲያ ቀጣይ የትብብር አቅጣጫዎች ላይ ውይይት ማድረጋቸውን ከጠቅላይ ሚኒስትር ፅህፈት ቤት ያገኘነው መረጃ ያመለክታል፡፡
 
ጠቅላይ ሚኒስትር ዶክተር አብይ አህመድ የሚሳተፉበት የአፍሪካ ሩሲያ ኢኮኖሚ ፎረም በሩሲያ ሶቺ እየተካሄደ ይገኛል።
 
ዛሬ እና ነገ በሚካሄደው በዚህ የኢኮኖሚ ፎረም ላይ ከ35 በላይ የአፍሪካ ሀገራት መሪዎች ለመሳተፉ ሩሲያ ገብተዋል።
 
የአፍሪካ መሪዎች የሚገኙበት እና የተለያዩ ተቋማትና ድርጅቶች አመራሮች የሚሳተፉበት ይህ ፎረም በአፍሪካ ሩሲያ ግንኙነት ታሪክ ውስጥ የመጀመሪያው ነው ተብሏል።
You might also like
Comments
Loading...