Fana: At a Speed of Life!

ጠቅላይ ሚኒስትር ዶክተር አብይ ሶቺ ሩሲያ ገቡ

አዲስ አበባ፣ ጥቅምት11፣ 2012 (ኤፍ ቢ ሲ) ለሩሲያ-አፍሪካ የኢኮኖሚ ፎረም ወደ ሀገሪቱ ያቀኑት የኢፌዴሪ ጠቅላይ ሚኒስትር ዶክተር አብይ አህመድ ፎረሙ በሚካሄድባት ሶቺ ከተማ ገብተዋል።

ፎረሙ ከነገ ጀምሮ ለሁለት ቀናት ይካሄዳል።

በሩሲያና በአፍሪካ መካካል ፖለቲካዊ፣ ኢኮኖሚያዊና ማኅበራዊ ግንኙነትን ማጠናከር የፎረሙ ዋነኛ ዓላማ እንደሆነ ተገልጿል።

ከጠቅላይ ሚኒስትር አብይ አህመድ በተጨማሪ የ46 የአፍሪካ አገራት መሪዎች፣ በአህጉሪቱ የሚገኝ የንግድ ማኅበረሰብና ሌሎች ዓለም አቀፋዊ ተቋማት በፎረሙ እንደሚሳተፉ የሚጠበቅ ሲሆን፥ እስካሁንም የበርካታ የአፍሪካ ሀገራት መሪዎች ወደ ከተማዋ ገብተዋ።

ፎረሙን የሩሲያው ፕሬዚዳንት ቭላድሚር ፑቲን እና የወቅቱ የአፍሪካ ኀብረት ሊቀ መንበር የግብፁ ፕሬዚዳንት አብዱል ፈታ አልሲሲ እንደሚከፍቱት መረጃዎች ጠቁመዋል።

ሩሲያ በቀድሞው ሶቬት ኅብረት ጥላ ስር በአፍሪካ የነበራት ተጽዕኖ ከፍተኛ ሲሆን ከሁለተኛው የዓለም ጦርነት ማብቃት በኋላ ግንኙነቱ ቀስ በቀስ እየቀነሰ መሄዱ ይነገራል።

ሀገሪቷ እንደ አውሮፓውያን አቆጣጠር በ2018 ከሰሃራ በታች ካሉ ሀገራት ጋር ያደረገችው የንግድ ልውውጥ 20 ቢሊየን ዶላር ብቻ መሆኑ ለአብነት ይጠቀሳል።

በአንጻሩ የአውሮፓ ህብረት አገራትና ቻይና በቅደም ተከተል የ300 እና የ200 ቢሊየን ዶላር የንግድ ልውውጥ ከአህጉረ አፍሪካ ጋር አድርገዋል።

እንደ ኢዜአ ዘገባ ፎረሙ ሩሲያ በአፍሪካ ያለውን ምቹ የቢዝነስ ሁኔታ በመጠቀም ረገድ ያለባትን ክፍተት ለመቅረፍ ቁርጠኛ አቋም መያዟን እንደሚያሳይም የምጣኔ ሃብት ምሁራን እየተነተኑ ነው።

You might also like
Comments
Loading...