Fana: At a Speed of Life!

ግድቡን በተመለከተ የግብጽ ጫናን ለመመከት ሀገራዊ አንድነትና ጠንካራ ኢኮኖሚን መገንባት ይገባል- የፖለቲካ ፓርቲ አመራሮች

አዲስ አበባ፣ ጥቅምት 3፣ 2012 (ኤፍ ቢ ሲ) ታላቁን የኢትዮጵያ ህዳሴ ግድብን በተመለከተ ግብጽ በኢትዮጵያ ላይ ጫና ለማሳደር እያደረገች ያለችውን ጥረት ለመመከት የተሻለ ሀገራዊ አንድነት በመፍጠር እና ጠንካራ ኢኮኖሚን በመገንባት ላይ መሰራት እንደሚገባ የፖለቲካ ፓርቲ አመራሮች ገለፁ።

ከፋና ብሮድካስቲንግ ኮርፖሬት ጋር ቆይታ ያደረጉት የፖለቲካ ፓርቲ አመራሮቹ፥ መሰል ኢትዮጵያን ጫና ዉስጥ ለመክተት የሚደረጉ እንቅስቃሴዎች በቃላትም፤ በተግባርም በታሪክ ሂደት እንደነበሩ አስታውሰዋል።

ሆኖም በዚህ ተስፋ ባለመቁረጥ የተጀመረውን ታሪካዊ አሻራ የማኖር ተግባር ለማጠናቀቅ ሁሉም መረባረብ አለበት ነው ያሉት።

የትግራይ ዴሞክራሳዊ ትብብር ሊቀመንበር ዶክተር አረጋዊ በርሄ እንደሚሉት መሰል የግብጽ የአባይን ውሃ ለብቻ ለመጠቀም መፈለግ ዘመናትን የተሻገረ እና በተለያዩ ጊዜያትም ኢትዮጵያን በቅኝ አገዛዟ ስር ለማድረግ ያደረገችው ሙከራ ማሳያ ነው ብለዋል።

በእነዚህ ሙከራዎች ወቅት ሁሉ ኢትዮጵያ በአሸናፊነት መሻገሯን ነው ያነሱት።

የኢዜማ ሊቀመንበር አቶ የሺዋስ አሰፋ በበኩላቸው፥ የተለያዩ ሀገራት ኢትዮጵያ የፖለቲካ ያለመረጋጋት ይታይባታል ብለው ባሰቡበት ወቅት ከወሬ በዘለለ በሀይል ሀገሪቱን ለማንበርከክ መሞከር አዲስ አለመሆኑን ጠቅሰዋል።

ለዚህ ደግሞ የሶማሊያን ጦርነት የሚያስታውሱት አቶ የሺዋስ፥ የዚያድ ባሬ መንግስት የደርግ መንግስት ተዳክሟል ብሎ በገመተበት ጦርነት ውስጥ ተገብቶ እንደነበርም አንስተዋል።

የኦፌኮ ሊቀመንበር ፕሮፌሰር መረራ ጉዲና ይህ የግብጽ አካሄድ የሀገር ውስጥ የፖለቲካ ትኩሳትን ለመቀልበስ የሚደረገ ጥረት መሆኑን ያብራራሉ።

ይህን ጫና ለመቋቋም ደግሞ የሀገር ውስጥ አንድነትን ማጠናከር እና ብሄራዊ መግባባት እንዲፈጠር መሰራት አለበት ነው ያሉት።

አንድነቱ የተጠበቀ መንግስት እና ህዝብ ሲፈጠር በቀላሉ የማይፈርስ ሀገር ይገነባል ብለዋል።

ዶክተር አረጋዊ በበኩላቸዉ መሰል ጫናዎችን ለመከላከል እንዲሁም የተጀመረውንም ፕሮጀክት ከግብ ለማድረስ ጠንካራ ኢኮኖሚ መገንባት ለነገ የሚተዉ ጉዳይ አይደለም ይላሉ።

በኢኮኖሚ የተደራጀ ህዝብ በዲፕሎማሲዉም እኩል የመደመጥ እድል ይኖረዋል ሲሉ ሀሳባቸውን ያቀርባሉ።

ሁሉም አመራሮች ሀገር እንዲህ ጫናዎች ሲበረቱባት የኖረ ሀገርን የማስቀደም ስራን በመስራት እና የተጋመሰዉን ታሪካዊ ግድብ ከግብ ለማድረስ ሁሉም ሊረባረበ ይገባል ብለዋል።

በአፈወርቅ አለሙ

You might also like
Comments
Loading...