Fana: At a Speed of Life!

ግብፅ በህዳሴ ግድብ የውሃ አሞላል ላይ ያነሳችው አቋም የኢትዮጵያን ቀይ መስመር የሚያልፍ ነው

አዲስ አበባ፣ መስከረም 27፣ 2012 (ኤፍ.ቢ.ሲ) ግብፅ በታላቁ የኢትዮጵያ ህዳሴ ግድብ የውሃ አሞላል ዙሪያ ያነሳችው አቋም የኢትዮጵያን ቀይ መስመር የሚያልፍ በመሆኑ ከመግባባት ላይ መድረስ እየተቻለ አይደለም አለ የውሃ መስኖና ኢነርጂ ሚንስቴር።

የኢትዮጵያ ህዳሴ ግድብ ህዝባዊ ተሳትፎ ማስተባበርያ ምክር ቤት ፅህፈት ቤት በግድቡ ሁለንተናዊ ጉዳይ ላይ ከተለያዩ አካላት ጋር በዛሬው እለት የምክክር መድረክ አካሂዷል።

በመድረኩ የግድቡ ግንባታ ያለበትን ደራጃ እና የታችኛው ተፋሰስ አገራት የሶስትዮሽ ውይይት ወቅታዊ ሁኔታን በተመለከተ ሀሳቦች ተነስተው ውይይት ተደርጎበታል።

የውሃ መስኖና ኢነርጂ ሚኒስትር የድንበርና ድንበር ተሻጋሪ ወንዞች ጉዳይ አማካሪ አቶ ተፈራ በየነ፥ በኢትዮጵያ፣ ሱዳን እና ግብጽ መካከል እየተደረገ ባለው የሶስትዮሽ ውይይት ዙሪያ ማብራሪያ ሰጥተዋል።

በማብራሪያቸውም ግብጽ በየዓመቱ 40 ቢሊየን ሜትር ኪዮብ ውሃ ይለቀቅልኝ ማለቷ እና የአስዋን ግድብ ከፍታ ከባህር ጠለል በላይ 165 ሜትር ሲደርስ ኢትዮጵያ ውሃ መልቀቅ አለባት፤ እንዲሁም ሶስተኛ ወገን በአደራዳሪነት ይግባ የሚል አቋም ማቅረቧን አንስተዋል።

ግብፅ በውይይቶቹ ላይ እያነሳች ያለው አቋም በኢትዮጵያ በኩል የህልውና እና የሉአላዊነት ጉዳይ በመሆኑ ውድቅ መደረጉን ነው አቶ ተፈራ የገለጹት።

ግብጽ በታላቁ ህዳሴ ግድብ ላይ የምታነሳቸው ሀሳቦች የኢትዮጵያን ቀይ መስመር የሚያልፍ መሆኑንም አቶ ተፈራ አንስተዋል።

ግብፅ በካርቱም በተደረገው ስብሰባ ላይም ብዙ የማያግባቡ አጀንዳዎችን ስታቀርብ እንደነበረ እና በውይይቶቹ ላይ እያሳየች በሚገኘው አቋም ደግሞ ከመግባባት ላይ መድረስ እየተቻለ አይደለም ብለዋል።

በካርቱሙ ውይይት ላይ ሶስቱም ሀገራት በተናጠል ካቀረቡት ሀሳቦች መካከል ውስጥ ኢትዮጵያ ግድቡ በሶስት ደረጃ ውሃ ይሞላ በሚል እና ሁለቱ ተርባይኖች ያለ ቅድመ ሁኔታ ስራ ይጀመሩ የሚለው ላይ መስማማት ላይ ቢደረስም፤ ግብጽ እኔ ያቀረብኩት ሀሳብ ሙሉ ተቀባይነት ካላገኘ በእነዚህ ላይ ቃለ ጉባዔ አይያዝም ማለቷንም አስታውቀዋል።

ግብፅ በታላቁ የህዳሴ ግድብ የውሃ አሞላል ላይ የምታቀርባቸው ሃሳቦችን መቀበል ማለት ያሁኑን ብቻ ሳይሆን በቀጣዩ የኢትዮጵያ ትውልድ ላይ ጉዳት የሚያደርስ በመሆኑ ተቀባይነት እንደሌለውም አስታውቀዋል።

ኢትዮጵያ አሁን ላይ የግድቡ አሞላል ውይይት ከፖለቲካ ወጥቶ ቴክኒካዊ እስከሆነ ድረስ ውይይቱን ለመቀጠል ዝግጁ መሆኗን ገልጸዋል።

የታላቁ የኢትዮጵያ ህዳሴ የኤሌክትሪክ ኃይል ማመንጫ ግድብ ፕሮጀክ ሥራ አስኪያጅ ኢንጂነር ክፍሌ ሆሮ በመድረኩ ላይ የግድቡ ግንባታ ያለበትን ደረጃ ያነሱ ሲሆን፥ የግድቡ ግንባታ በአሁኑ ወቅት 68 ነጥብ 56 በመቶ ላይ መድረሱን ገልፀዋል።

ከዚህ በተጨማሪም ሁለቱ ተርባይኖች ወደ ሀይል ማምረት እንዲገቡ ለማድረግ ስራዎች እየተጠናቀቁ መሆኑንም አንስተዋል።

በውይይት መድረኩ ላይ የታላቁ ህዳሴ ግድብ ግንባታ ህዝባዊ ተሳትፎ አስተባባሪ ብሔራዊ ምክር ቤት ባለፈው በጀት ዓመት ከቦንድ ሽያጭና መሰል የገቢ ማሰባሰቢያ መንገዶች 970 ሚሊየን ብር ከህብረተሰቡ መሰብሰቡም አስታውቋል።

በካሳየ ወልዴ

You might also like
Comments
Loading...