Fana: At a Speed of Life!

ዶናልድ ትራምፕ የተወሰኑ የአሜሪካ ወታደሮች በሶሪያ እንደሚቆዩ አስታወቁ

አዲስ አበባ ፣ ጥቅምት 11 ፣ 2012 (ኤፍ ቢ ሲ) የአሜሪካው ፕሬዚዳንት ዶናልድ ትራምፕ የተወሰኑ የአሜሪካ ወታደሮች በሶሪያ እንደሚቆዩ አስታወቁ።

ትራምፕ በጣም ጥቂት ወታደሮች በሃገሪቱ የነዳጅ ማውጫ ስፍራዎችን ሲቆጣጠሩ፥ የተወሰኑት ደግሞ በእስራኤል እና ዮርዳኖስ ድንበር አቅራቢያ እንደሚቆዩ ተናግረዋል።

ትራምፕ ከሁለት ሳምንት በፊት የአሜሪካን ወታደሮች ሶሪያ ከቱርክ ከምትዋሰንባቸው አካባቢዎች ለማስወጣት መወሰናቸው ይታወሳል።

በወቅቱ ይህ ውሳኔያቸው ከበርካቶች ተቃውሞን ያስተናገደ ሲሆን፥ በዛሬው እለት ይህን ሃሳባቸውን ቀይረው አዲስ መመሪያ ሰጥተዋል።

ፕሬዚዳንቱ ሃገራቸው በሶሪያ ከሚገኙ የአሜሪካ ወታደሮች የተወሰኑትን እንድታስወጣ ከእስራኤልና ዮርዳኖስ ጥያቄ እንደቀረበላቸውም ገልጸዋል።

በሶሪያ ሰሜናዊ ክፍል ቱርክ በአካባቢው ሰላማዊ ቀጠና ለመፍጠር በሚል በኩርድ ታጣቂ ሃይሎች ላይ ጥቃት ስትፈጽም ቆይታለች።

ካለፈው ሳምንት መጨረሻ ጀምሮ ደግሞ ለአምስት ቀናት የሚቆይ የተኩስ አቁም በስፍራው ገቢራዊ ለማድረግ ተስማምታለች።

ይህን ተከትሎም የኩርድ ታጣቂ ሃይሎች አካባቢውን ለቀው መውጣት መጀመራቸውን ሲገልጹ ቆይተዋል።

ዓለም ላይ ግጭት ባለባቸው አካባቢዎች ወደ 200 ሺህ የሚጠጉ የአሜሪካ ወታደሮች እንደሚገኙ መረጃዎች ያመላክታሉ።

 

 

 

ምንጭ፦ ቢቢሲ

 

 

You might also like
Comments
Loading...