Fana: At a Speed of Life!

የፌዴሬሽን ምክር ቤት የክልሎች የድጎማ በጀት የማከፋፈያ ቀመርን ለ2 ዓመት አራዘመ

አዲስ አበባ፣ መስከረም 27፣ 2012 (ኤፍ.ቢ.ሲ) የፌዴሬሽን ምክር ቤት የፌዴራል መንግስት ለክልሎች የሚያደረገው የድጎማ በጀት የማከፋፈያ ቀመርን ለሁለት ዓመት አራዘመ።

የኢ.ፌ.ዴ.ሪ የፌዴሬሽን ምክር ቤት በዛሬው እለት ባካሄደው 5ኛ የፓርላማ ዘመን 5ኛ ዓመት የሥራ ጊዜ 1ኛ መደበኛ ስብሰባ የተለያዩ ጉዳዮችን ተመልክቶ ውሳኔዎችን አሳልፏል።

ምክር ቤቱ ከተመለከታቸው ጉዳዮች ውስጥ የፌዴራል መንግስት ለክልሎች የሚያደረገው የድጎማ በጀት የማከፋፈያ ቀመር አንዱ ነው።

ምክር ቤቱ ከዚህ ቀደም ይጠቀምበት የነበረውን ቀመር ከ2010 በጀት ዓመት ጀምሮ ለሶሰት ዓመታት እስከ 2012 በስራ ላይ እንዲወል መወሰኑ ይታወሳል።

በድጎማ በጀት ክፍፍል ቀመር ላይ የሚነሱ የፍትሃዊነት ጥያቄን ለመመለስ ከህዝብና ቤት ቆጠራ ጋር ተያያዥነት ያላቸው ወቅታዊ መረጃዎችን በመተንተን አዲስ ቀመር በ2013 በጀት ዓመት ተግባራዊ ለማድረግ እቅድ ተይዞ ነበር።

ሆኖም የህዝብና ቤት ቆጠራ በመራዘሙ እና ቀጣይ ሀገራዊ ምርጫ የሚካሄድበት በመሆኑ አዲሱን ቀመር የፌዴራልና የክልል አመራሮችን አግኝቶ ቀመሩን አሳታፊ በሆነ መንገድ ለማዘጋጀት አስቸጋሪ መሆኑ ተጠቅሷል።

አሁን በስራ ላይ ያለው የድጎማ በጀት ቀመር ለሁለት አመት እንዲራዘምና ከ2015 በጀት ዓመት ጀምሮ ተግባራዊ የሚደረግ አዲስ የድጎማ ማከፋፈያ ቀመር ዝግጅት ከተያዘው ዓመት አንስቶ እንዲጀመር የውሳኔ ሀሳብ ለምክር ቤቱ ቀርቧል።

የፌደሬሽን ምክር ቤት አባላት የድጎማ ማከፋፋያ ቀመሩ ለማራዘም የቀረቡ ምክንያቶች ተገቢነት የሌላቸው መሆኑን ያነሱ ሲሆን፥ የጋራ ገቢና የድጎማ በጀት ጉዳዮች ቋሚ ኮሚቴ አባለት ደግሞ ቀመሩን ለሁለት ዓመት ማራዘም ያስገደደውን መንስኤ አብራርተዋል።

በዚህም ምክር ቤቱ በስራ ላይ ያለው የድጎማ በጀት ማከፋፈያ ቀመሩ ለሁለት ዓመት እንዲራዘም በአብላጫ ድምጽ ወስኗል።

በተጨማሪም ምክር ቤቱ የህገ መንግስት ትርጉም ያስፈልጋቸዋል ተብለው በቀረቡለት ጉዳዮች ላይ ተወያይቶ ውሳኔ አሳልፏል።

የህገ መንግስት ትርጉምና የማንነት ጉዳዮች ቋሚ ኮሚቴ ባደረገው ማጣራት 8 ማመልከቻዎች ቀርበውለት ጉዳዮቹን ከመረመረ በኋላ ለምክር ቤቱ የውሳኔ ሃሳብ አቅርቦ ነበር።

ምክር ቤቱም የቀረቡት ስምንት ማመልከቻዎች ውስጥ ስድስቱ የህገ መንግስት ትርጉም ያስፈልጋቸዋል ያለ ሲሆን፥ ቀሪ ሁለቱ ማመልከቻዎች ደግሞ የህገ መንግስት ትርጉም እንደማያስፈልጋቸው ነው ውሳኔ ያሳለፈው።

በበላይ ተስፋዬ

You might also like
Comments
Loading...