Fana: At a Speed of Life!

የፊንላንድ ፕሬዚዳንት በኢትዮጵያ ይፋዊ ጉብኝት እያደረጉ ነው

አዲስ አበባ፣ ጥቅምት 4፣ 2012 (ኤፍ.ቢ.ሲ) የፊንላንድ ሪፑብሊክ ፕሬዚዳንት ሳዩሊ ኒኒስቶ በኢትዮጵያ የሁለት ቀናት ይፋዊ ጉብኝት ለማድረግ አዲስ አበባ ገብተዋል።

ፕሬዚዳንቱ የኢትዮጵያ የሁለት ቀናት ይፋዊ የስራ ጉብኝታቸውንም በማካሄድ ላይ ይገኛሉ።

በጉብኝታቸውም ከፕሬዚዳንት ሳህለወርቅ ዘውዴ ጋር ተገናኝተው በኢትዮጵያና በፊንላንድ ስላለው የሁለትዮሽ ግንኙነት እንዲሁም በቀጠናዊና አለም አቀፍ ጉዳዮች ላይ ውይይት አድርገዋል።

በውይይታቸውም የኢትዮጵያ እና የፊንላንድ ግንኙነት የጋራ መግባባትና መከባበር በሰፈነበት መልኩ መልካም የሆነ እመርታ እያሳየ መምጣቱን አንስተዋል።

በቀጣይነትም ይህን ግንኙነታችንን በጋራ ጉዳዮቻችን ላይ አጠናክሮ ለማስቀጠልም ከስመምነት መድረሳቸውን የፕሬዚዳንት ጽህፈት ቤት አስታውቋል።

እንዲሁም የሁለቱ ሀገራት የልማት ትብብር ሁኔታን የዳሰሱ ሲሆን፥ የፊንላንድ መንግስት ለኢትዮጵያ የልማት ስራዎች እስካሁን ሲያደርግ ለቆየው ድጋፍ ፕሬዚዳንት ሳህለወርቅ ምስጋና አቅርበዋል።

ወደፊትም የኢትዮጵያን የለውጥ ጉዞ ለማፋጠን የሚኖረውን ፋይዳ ከግምት ውስጥ በማስገባት የልማት ትብብሩን ማሳደግ እንደሚገባ ከስምምነት መድረሳቸው ነው የተገለፀው።

ፕሬዚዳንት ሳዩሊ ኒኒስቶ በኢትዮጵያ በቆይታቸው በአየር ንብረት ለውጥ እና የሴቶች የኢኮኖሚ ተጠቃሚነት ላይ ትኩረታቸውን ባደረጉ ሁለት ትላልቅ ጉባኤዎች ላይ ንግግር ያደርጋሉ።

እንዲሁም በፊንላንድ ድጋፍ የሚደረግለትን የመጀመሪያ ደረጃ ትምህርት ቤት እንደሚጎበኙም ይጠበቃል።

ጉብኝቱ በኢትዮጵያና በፊንላንድ መካከል በፕሬዚዳንት ደረጃ የተደረገ የመጀመሪያ ጉብኝት ሲሆን፥ ለፕሬዚዳንት ሳዩሊ ኒኒስቶ ደግሞ በአፍሪካ የሚያደርጉት የመጀመሪያ ይፋዊ የስራ ጉብኝታቸው ነው።

ኢትዮጵያና ፊንላንድ እ.ኤ.አ ከ1957 ዓ.ም ጀምሮ የሁለትዮሽ ግንኙነት ያላቸው ሲሆን፥ ፊንላንድ አዲስ አበባ ባለው ኤምባሲዋ ስትወከል በኢትዮጵያ በኩል ስቶኮልም የሚገኘው የኢፌዲሪ ኤምባሲ ፊንላንድን ሸፍኖ ይሰራል።

You might also like
Comments
Loading...