Fana: At a Speed of Life!

የደስታ መግለጫ ሰልፎች በተለያዩ ከተሞች ተካሄዱ

አዲስ አበባ፣ ጥቅምት 02፣ 2012 (ኤፍ ቢ ሲ) ጠቅላይ ሚኒስትር ዶክተር አብይ አህመድ የኖቤል የሰላም ሽልማት ማግኘትን በማስመልከት በዛሬው እለት በተለያዩ ከተሞች የደስታ መግለጫ ሰልፎች ተካሄዱ።

ሰልፎቹ አዳማ፣ ጅማ፣ አምቦ፣ መቱ፣ ዱከም እና ገላንን ጨምሮ በተለያዩ የኦሮሚያ ከተሞች እንዲሁም በድሬዳዋ፣ ሀረር እና ሶማል ክልል ደጋሃቡር ተካሂደዋል።

ሰልፈኞቹ በሰልፎቹ ላይ “የኖቤል የሰላም ሽልማት የመደመር ፍልስፍና ውጤት እና አሸናፊ ሃሳብ አለምአቀፍ ሽልማትን ያመጣል” የሚሉ መፈክሮችን በመያዝ ወጥተዋል።

የፋና ብሮድካስቲንግ ኮርፖሬት ሪፖርተሮች ያነጋገሯቸው የሰልፉ ተሳታፊዎችም፥ በሽልማቱ ከፍተኛ ደሰታ እንደተሰማቸው በመግለፅ ለሰላም ሁሉም መትጋት እንዳለበት ያሳያል ብለዋል።

በተመሳሳይ የጅማ ከተማና አካባቢዋ ነዋሪዎች ዛሬ ጠዋት ከ12 ሰዓት ጀምሮ የተለያዩ የድጋፍ መልክት ያዘሉ ባነሮችን በመያዝ ነው በጅማ ስታዲየም በመገኘት ድጋፋቸውን የገለፁት።

የጅማ ከተማ ከንቲባ አቶ መኪዩ መሀመድ ሀገሪቷ ከሁለት አመት በፊት የነበረችበትን ሁኔታ በማስታወስ አሁን የመጣውን ለውጥ ለማሳካት ሁሉም ሀላፊነታቸውን እንዲወጡ ጥሪ አስተላልፈዋል።

የጅማ ዞን አስተዳዳሪ አቶ አብዱልሀኪም ሙሉ በበኩላቸው ለዶክተር አብይ የኖቤል የሰላም ሽልማት ሲሰጥ ሰላማችንን እንድንጠብቅ ለኛም ትልቅ ሀላፊነት እንደተሰጠን ልናስብ ይገባል ብለዋል።

በሰልፉ ላይ የተገኙት አቶ ሌንጮ ባቲ በበኩላቸው ጠቅላይ ሚኒስትሩ በአጭር ጊዜ ውስጥ ያመጡትን ስኬት በማንሳት፥ ከዚህ በኋላ መወቃቀስ አቁመን አገራችንን ወደ ፊት ለማራመድ እንነሳ ሲሉ ጥሪ አቅርበዋል።

 

በሀብታሙ ተክለስላሴና ሙክታር ጠሃ

You might also like
Comments
Loading...