Fana: At a Speed of Life!

የደም ግፊት መድሃኒትን ከመኝታ በፊት ወስዶ መተኛት የበለጠ ውጤታ ነው- ጥናት

አዲስ አበባ፣ ጥቅምት 12፣ 2012 (ኤፍ.ቢ.ሲ) የደም ግፊት መድሃኒትን ማታ ከመኝታ በፊት ወስዶ መተኛት ጠቃሚ መሆኑን አንድ ጥናት አመለከተ፡፡

በስፔን ተመራማሪዎች የተሰራው እና የአውሮፓ የልብ ጆርናል ላይ የወጣው ጥናት የደም ግፊት መድሃኒት ማታ ከመኝታ በፊት ተጠቅሞ መተኛት የተሻለ ውጤታማ መሆኑን ይፋ አድርጓል፡፡

በ19 ሺህ የመድሃኒቱ ተጠቃሚዎችን ከፊሎቹ ማታ ከመኝታ በፊት እና ከፊሎቹ ጧት እንዲወስዱ በማድረግ ለ5 ዓመታት በተደረገ ክትትል ውጤቱ መገኘቱም ነው የተገለጸው፡፡

በዚህም መድሃኒቱን ማታ ከመኝታ በፊት እንዲጠቀሙ የተደረጉት ሰዎች በልብ ህመም እና ስትሮክ የመሞት ምጣኔ ዝቅ ብሎ መስተዋሉን ነው ዘገባው የሚያመላክተው፡፡

በዚህ የጥናት ቡድን የተካተቱት ሰዎች የደም ግፊት መጠን በአማካይ ዝቅ ብሎ መታየቱም ተገልጿል፡፡፡

ከዚህ ቀደም ሃኪሞቹ መደሃኒቱን ሲያዝዙ መድሃኒቱ መወሰድ ያለበትን ሰዓት መወሰን ያልተለመደ ሲሆን÷ የመደሃኒቱን አወሳሰድ ሰዓት በማስተካከል ውጤታማነቱን ከፍ ማድረግ እንደሚቻል ተማራማሪዎቹ ገልጸዋል፡፡

የብሪታኒያ የልብ ፋውንዴሽን ባልደረባ የሆኑት ቫንሳ ስሚዝ በተለያዩ የደም ግፊት መድሃኒት አይነቶች እና አካባቢዎች ሌሎች ተጨማሪ ጥናቶች ማድረግ አስፈላጊ መሆኑን ገልጸዋል፡፡

የመድሃኒቱ ተጠቃሚዎቹ መድሃኒቱን የሚወስዱበትን ሰዓት ከመቀየራቸው በፊት ሃኪሞቻቸውን ማማከር እንደሚገባቸው ጠቁመዋል፡፡

ሲጋራ ማጨስ፣ የሰውነት ክብደት፣ የአካል ብቃት እንቅስቃሴ አለመድረግ፣ ጨውን አብዝቶ መመገብ እና ሌሎች ሁኔታዎችም ከግንዛቤ መግባት እንዳለባቸው ነው ዘገባው የሚያስረዳው፡፡

ምንጭ፡- ቢ ቢ ሲ

You might also like
Comments
Loading...