Fana: At a Speed of Life!

የውጭ ጉዳይ ሚኒስትር ዴኤታ ወ/ሮ ሂሩት የጣሊያን የምስራቅ አፍሪካ ልዩ መልዕክተኛ ጋር ተወያዩ

አዲስ አበባ፣ ጥቅምት 6፣ 2012 (ኤፍ.ቢ.ሲ) የኢፌዲሪ የውጭ ጉዳይ ሚኒስትር ዴኤታ ወይዘሮ ሂሩት ዘመነ በጣሊያን የውጭ ጉዳይ ሚኒስቴር የምስራቅ አፍሪካ ሀገሮች ልዩ መልዕክተኛ ሉቻኖ ፔዞቴ ጋር ተወያዩ።

ሚኒስትር ዴኤታ ወይዘሮ ሂሩት በዚህ ወቅት፥ ኢትዮጵያና ጣሊያን ጠንካራና ዘርፈ ብዙ ድፕሎማሲያዊ ግንኙነቶች እንዳላቸው መግለጻቸውን የውጭ ጉዳይ ሚኒስቴር ቃል አቀባይ ጽህፈት ቤት አስታውቋል።

የአፍሪካ ቀንድ የትብብር ቀጠና እንዲሆን ጣሊያን የምታካሂደውን ገንቢ ሚናም ያደነቁ ሲሆን፥ የምስራቅ አፍሪካ ሀገራት ከመቸውም ጊዜ በላይ በሰላምና ፀጥታ እንዲሁም በጋራ የመልማት የትብብር መንፈስ ከፍተኛ ቁርጠኛነት የታየበት ወቅት መሆኑን ገልጸዋል።

በቀጠናው ዘላቂ ልማትን በማምጣት ሰላም ለማስፈን እንዲቻል የጋራ ሀብቶችን በፍትሃዊነትና በምክንያታዊነት ለመጠቀም ኢትዮጵያ የራሷን ሚና በአግባቡ እየተወጣች መሆኑንም ወይዘሮ ሂሩት አስታውቀዋል።

ልዩ መልዕክተኛው ሉቻኖ ፔዞቴ በበኩላቸው፥ በቀጠናው እየተካሄደ ያለውን ትብብር በተመለከተ ስለተደረገላቸው ገለፃ በማመስገን፤ በምስራቅ አፍሪካ በተለይም ኢትዮጵያን፣ ኤርትራንና ሶማሊያን ያካተተ የመሰረተ-ልማት ዝርጋታ ላይ ጣሊያን ድጋፍ ለማድረግ ፍላጎት እንዳላት ገልጸዋል።

ለዚህም ይረዳ ዘንድ በያዝነው ዓመት ሶስቱን ሀገራት ያካተተ የቢዚነስ ፎረም ለማካሄድ እንደታሰበና ከሀገራቱ ጋር ምክክር እያደረጉ እንደሆነም ገልጸዋል።

You might also like
Comments
Loading...