Fana: At a Speed of Life!

የኢትዮ-ፈረንሳይ የቢዝነስ ፎረም በፓሪስ ተጀመረ

አዲስ አበባ ፣ ጥቅምት 10 ፣ 2012 (ኤፍ ቢ ሲ) የኢትዮ- ፈረንሳይ ቢዝነስ ፎረም ዛሬ በፓሪስ ከተማ በይፋ ተጀምረ።

ፎረሙን የኢፌዴሪ ምክትል ጠቅላይ ሚኒስትር አቶ ደመቀ መኮንን በመክፈቻ ንግግር አስጀምረዋል።

በመክፈቻው ላይ ባስተላለፉት መልዕክት፥ ኢትዮጵያ ምድረ ቀደምት ሃገር፣ የብዝሃነት መኖሪያ እና የኢንቨስትመንት ተመራጭ መዳረሻ መሆኗን ተናግረዋል።

ኢትዮጵያ ዘላቂ ልማት እና ሁሉን አቀፍ ዕድገት በፍጥነት ለማረጋገጥ የተለያዩ የሪፎርም ፕሮግራም ተግባራዊ በማድረግ ላይ መሆኗን አንስተዋል።

የኢትዮጵያ እና የፈረንሳይ ትብብር የበለጠ ሊጎለብት የሚችለው በንግድ እና በኢንቨስትመንት ትርጉም ባለው ደረጃ መደገፍ ሲቻል መሆኑንም ነው የገለጹት።

መንግሥት ለውጭ ባለሃብቶች የተመቸ የኢንቨስትመንት ድባብ ለመፍጠር በትኩረት እየሰራ መሆኑን ጠቁመዋል።

በመጨረሻም በፎረሙ ለተሳተፉ የኢትዮጵያ እና የፈረንሳይ ባለሃብቶች የሁለቱ ሀገራት ትብብር በንግድ እና በኢቨስትመንት ትስስር እንዲያጠናክሩ ጥሪ አቅርበዋል።

በሌላ በኩል ምክትል ጠቅላይ ሚኒስትር አቶ ደመቀ ከፈረንሳይ የግሉ ዘርፍ ኮንፌዴሬሽን የአፍሪካ ኮሚቴ አባላት ጋር ተወያይተዋል።

ምክትል ጠቅላይ ሚኒስትሩ ከባለሃብቶቹ ለተነሱ ጥያቄዎች ማብራሪያና ምላሽ የሰጡ ሲሆን፥ በኢትዮጵያ የኢንቨስትመንት ድባቡን አስመልክቶ በተከናወኑ ማሻሻያዎች ዙሪያ ገለፃ አድርገዋል።

መንግስት በቀጣይ ለውጭ ባለሃብቶች የተመቸ የቢዝነስ አውድ ለመፍጠር በትኩረት እየሰራ መሆኑንም አስረድተዋል።

የተጀመሩ የማሻሻያ ፕሮግራሞችን በተሟላ አግባብ ተግባራዊ በማድረግ፥ የኢትዮጵያ እና የፈረንሳይ ምጣኔ ሃብታዊ ግንኙነት የተሻለ እንደሚያድግም አመላክተዋል።

የፈረንሳይ የግሉ ዘርፍ ኮንፌዴሬሽን የአፍሪካ ኮሚቴ አባላት በበኩላቸው፥ በኢትዮጵያ መንግሥት የጀመረውን የኢኮኖሚ ማሻሻያ እንቅስቃሴ አድንቀዋል።

አባላቱ በኢትዮጵያ የጀመሩትን ኢንቨስትመንት እንደሚያጠናክሩ መናገራቸውንም ከምክትል ጠቅላይ ሚኒስትር ፅህፈት ቤት ያገኘነው መረጃ ያመላክታል።

በቀጣይም ስምሪታቸውን ለማስፋትና የኢንቨስትመንት ድባቡን የበለጠ ሳቢ ለማድረግ በትብብር እንደሚሰሩ አረጋግጠዋል።

 

You might also like
Comments
Loading...