Fana: At a Speed of Life!

የኢትዮጵያ ንግድ ባንክ የደቡብ ሱዳን የልማት ፕሮጀክቶችን ለማገዝ መዘጋጀቱን ገለፀ

አዲስ አበባ፣ መስከረም 27፣ 2012 (ኤፍ.ቢ.ሲ) የኢትዮጵያ ንግድ ባንክ በደቡብ ሱዳን የተለያዩ የልማት ፕሮጀክቶችን ለማገዝ ጥናት አጠናቅቆ ወደ ትግበራ ለመግባት መዘጋጀቱን ገለፀ።

የደቡብ ሱዳን ፕሬዚዳንት ሳልቫ ኪር ማያርዲት በደቡብ ሱዳን የሥራ ጉብኝት ያደረጉትን የኢትዮጵያ ንግድ ባንክ ፕሬዚዳንት አቶ ባጫ ጊናን እና በደቡብ ሱዳን የኢ.ፌ.ዲ.ሪ. ልዩ መልዕክተኛና ባለሙሉ ሥልጣን አምባሳደር ተፈሪ ታደሰ በጽህፈት ቤታቸው ተቀብለው አነጋግረዋል።

በቆይታቸውም ፕሬዚዳንት ሳልቫኪር፥ የኢትዮጵያ እና የደቡብ ሱዳን ወዳጅነት ከዲፕሎማሲያዊ ባሻገር በረጅም ሂደት የህዝብ ለህዝብ ትስስር የታገዘ መሆኑን ለልዑካን ቡድኑ ገልፀዋል።

ፕሬዝዳንቱ አክለውም በኢትዮጵያና በደቡብ ሱዳን መካከል የንግድ ትስስርን ለመፍጠር ሁለቱ ሀገራት በየብስ ትራንስፖርት መገናኘት እንዳለባቸው አንስተዋል።

ደቡብ ሱዳን ወደ የኢኮኖሚ መልሶ ግንባታ እየተሸጋገረች በመሆኗ በተለይም የኮንስትራክሽንና ግንባታ ግብዓቶችን ከኢትዮጵያ ወደ ደቡብ ሱዳን ለማስገባት ሁለቱን ሀገራት በመንገድ ትራንስፖርት ማገናኘት አስፈላጊ እንደሆነ አንስተዋል።

አምባሳደር ተፈሪ ታደሰ በውይይቱ፥ የኢትዮጵያ ኤምባሲ የኢትዮጵያ የኮሙኒቲ አባላትን በማስተባበር በደቡብ ሱዳን የልማት ስራዎች ንቁ ተሣትፎ እንደሚያደርግ መግለጻቸውን በደቡብ ሱዳን የኢትዮጵያ ኤምባሲ አስታውቋል።

የኢትዮጵያ ንግድ ባንክ ፕሬዚዳንት አቶ ባጫ ጊና በበኩላቸው ፥የኢትዮጵያ ንግድ ባንክ የደቡብ ሱዳን የተለያዩ የልማት ፕሮጀክቶችን በማገዝ በሁለቱ ሀገራት የኢኮኖሚ ትስስር በመፍጠር ረገድ የበኩሉን ድርሻ እንደሚወጣ ገልፀዋል።

ለዚህም ባንኩ የደቡብ ሱዳን የተለያዩ የልማት ፕሮጀክቶችን ለማገዝ ጥናት አጠናቅቆ ወደ ትግበራ ለመግባት መዘጋጀቱን ገልጸዋል።

ባንኩ ያቀዳቸውን የልማት ፕሮጀክቶችን እውን ለማድረግ ከኢትዮጵያ ኢምባሲ እና ከኢትዮጵያ አየር መንገድ ጋር በትብብር እንደሚሰራ አቶ ባጫ ገልጸዋል።

ኢትዮጵያ እና ደቡብ ሱዳን በዘርፈ ብዙ የልማት ስራዎች በትብብር ለመስራት ከአሁን ቀደም የተለያዩ ስምምነቶች መፈራረማቸው ይታወሳል።

You might also like
Comments
Loading...