Fana: At a Speed of Life!

የኢራቅ ፕሬዚዳንት የሀገሪቱ ወታደሮች በሰልፈኞች ላይ የወሰዱትን እርምጃ አወገዙ

አዲስ አበባ፣መስከረም 27፣2012 (ኤፍ ቢ ሲ) የኢራቅ ፕሬዚዳንት ባርሃም ሳሊህ የሀገሪቱ ወታደሮች ለተቃውሞ አደባባይ በወጡ ዜጎች ላይ የወሰዱትን ያልተመጣጠነ እርምጃ አውግዘዋል።

በኢራቅ በሺዎች የሚቆጠሩ ዜጎች በሀገሪቱ የሚስተዋለውን ሙስና፣ የስራ ዕድል እጦት እና ደካማ የህዝብ አገልግሎት አሰጣጥ ሂደትን  በመቃወም ሰላማዊ ሰልፍ  እያደረጉ ይገኛሉ።

የተቃውሞ ሰልፉም ዋና ከተማዋ ባግዳድን ጨምሮ በተለያዩ የሀገሪቱ ክፍሎች መቀስቀሱ ነው የተነገረው ።

የሀገሪቱ ፀጥታ ሃይሎች ለተቃውሞ አደባባይ በወጡ ሰልፈኞች ላይ በወሰዱት እርምጃም እስካሁን ከ100 በላይ ዜጎች መገደላቸውን የሀገሪቱ የሰብዓዊ መብት ኮሚሽን አስታውቋል።

የሀገሪቱ ጦርም የተቀሰቀሰውን ተቃውሞ ለመቆጣጠር ያልተመጣጠነ ሃይል መጠቀሙን አምኗል።

ይህን ተከትሎም ፕሬዚዳንት ባርሃም ሳሊህ የፀጥታ ሃይሎች በተቃዋሚዎች ላይ የወሰዱት እርምጃ  የዜጎችን ሀሳብን በነፃነት የመግለፅ መብት የሚገድብ ሃላፊነት የጎደለው ተግባር በማለት ኮንነውታል።

ፕሬዚዳንቱ በሀገሪቱ ብሄራዊ  ቴሌቪዥን ጣቢያ ቀጥታ ስርጭት ላይ ባስተላለፉት መልዕክት ተቃዋሚዎች የሚያነሷቸውን ጥያቄዎች ለመመለስ የተለያዩ ስራዎች እንደሚሰሩ ተናግረዋል።

በዚህ መሰረትም ሃላፊነታቸውን በተገቢው ሁኔታ ያልተወጡ ሚኒስትሮችን የመቀየር ስራ  የሚከናወን መሆኑን ነው የገለጹት።

ከዚህ ባለፈም የሀገሪቱ ፓርላማ  የምርጫ ህግ ማሻሻያን ጨምሮ የተቃዋሚዎችን ጥያቄ ለመመለስ የሚያስችሉ ተግባራትን እንዲያከናውን ጥሪ አቅረበዋል።

በሌላ በኩል ፕሬዚዳንት ባርሃም ሳሊህ ተቃዋሚዎች የሚያነሷቸውን ጥያቄዎች በጠረጴዛ ዙሪያ መፍታት የሚያስችል ብሄራዊ የውይይት መድረክ እንዲካሄድ ጥሪ አቅርበዋል።

ምንጭ ፦አልጀዚራ

You might also like
Comments
Loading...