Fana: At a Speed of Life!

የአሜሪካ ወታደሮች ከሶሪያ መውጣት ለቀጠናው መረጋጋት ከፍተኛ አስተዋፅኦ ይኖረዋል-ኢራን

አዲስ አበባ፣መስከረም 27፣2012 (ኤፍ ቢ ሲ) ኢራን የአሜሪካ ወታደሮች ሰሜን ሶሪያን ለቀው መውጣታቸው ለቀጠናው ሰላምና መረጋጋት ከፍተኛ አስተዋፅኦ ያለው መሆኑን ገልፃለች።

ቱርክ በሰሜን ሶሪያ የሚንቀሳቀሱ የኩርዲሽ አማፂያንን ለማስወገድ የሚያስችል ወታደራዊ ዘመቻ ልታካሂድ መሆኑን መግለጿ ይታወሳል።

ይህንን ተከትሎም በአካባቢው የሰላም ቀጠና ለመመስረት ከቱርክ ጋር የተስማማችው አሜሪካ በስፍራው የሚገኙ ሰላም አስከባሪ ወታደሮቿን ማስወጣት ጀምራለች።

የኢራን የውጭ ጉዳይ ሚኒስቴር ጉዳዩን አስመልክቶ በሰጠው መግለጫ የአሜሪካ ወታደሮች ከስፍራው መውጣት የአካባቢውን ሰላም ወደ ነበረበት ለመመስ ከፍተኛ  አስተዋፅኦ የሚኖረው መሆኑን አስታውቋል።

ስለሆነም አሜሪካ  በህገ ወጥ መልኩ በሶሪያ ምድር ያሰማራቻቸውን ወታደሮች በፍጥነት ማስወጣት እንደሚገባት ነው ሚኒስቴሩ ያሳሰበው።

ይህ በእንዲህ እንዳለ አንካራ በቀጠናው የምታካሂደውን የጸረ ሽብር ዘመቻ ለማካሄድ ዝግጁ መሆኗን የገለጸች ሲሆን፥ በአንፃሩ አሜሪካ በሚደረገው ዘመቻ ላይ ምንም አይነት ተሳትፎ የማታደርግ መሆኑን አስታውቃለች።

አማጺያኑ በበኩላቸው የሀገራቸውን ሉዓላዊነት ለማስጠበቅ ከቱርክ መንግስት የሚቃጣን ማንኛውንም ጥቃት ለመመከት ዝግጁ መሆናቸውን አስታውቀዋል።

በአሜሪካ እንደሚደገፉ የሚነገርላቸው በሰሜን ሶሪያ የሚንቀሳቀሱት የኩርዲሽ አማጺያን በቱርክ መንግስት በአሸባሪነት መፈረጃቸው ይታወቃል።

ምንጭ፦www.presstv.com

You might also like
Comments
Loading...