Fana: At a Speed of Life!

የተባበሩት ዓረብ ኤምሬቶች አዲስ ለሚገነባው የፓርላማ ህንፃ 370 ሚሊየን ዶላር ለመስጠት ቃል ገባ

አዲስ አባበ፣ ጥቅምት 4፣ 2012 (ኤፍ ቢ ሲ) የኢፌዴሪ የህዝብ ተወካዮች ምክር ቤት የተባበሩት ዓረብ ኤምሬቶች መንግሥት ኢትዮጵያ ለምታስገነባው አዲስ የፓርላማ ህንፃ 370 ሚሊየን ይአሜሪካ ዶላር ለመስጠት ቃል መግባቱን አስታወቀ።

በህዝብ ተወካዮች ምክር ቤት የውጭ ግንኙነትና ሰላም ጉዳዮች ቋሚ ኮሚቴ ሊቀመንበር አቶ ተስፋዬ ዳባ እንደገለፁት፥ የምክር ቤቱ ዲፕሎማሲ ሥራ የኢኮኖሚ ዲፕሎማሲን ማዕከል በማድረግ የመንግሥትን የልማት ግብ ይዞ የሚንቀሳቀስ ነው።

በቅርቡ በምክር ቤቱ አፈ ጉባዔ አቶ ታገሰ ጫፎ የሚመራ የልዑካን ቡድን በተባበሩት አረብ ኢምሬቶች ያደረገው የሥራ ጉብኝትና ዲፕሎማሲያዊ ጥረት ውጤታማ መሆኑን አቶ ተስፋዬ ተናግረዋል።

ሁለቱ ወገኖች መግባባት ላይ ደርሰውም ሀገሪቱ ገንዘቡን ለመርዳት ቃል በመግባት በወዳጅነት መፈራረማቸውን የኢትዮጵያ ፕሬስ ድርጅት ዘግቧል።

የአዲሱ የፓርላማ ህንፃ ግንባታ ለምክር ቤቱ አባላት ጠቃሚ ሚና አለው ያሉት አቶ ተስፋዬ፥ ለአባላቱ ሥራቸውን በአግባቡ ለማከናወን ምቹ ዐውድ የሚኖረውና ሥራቸውን በተሻለ መልኩ እንዲያከናውኑ የሚያስችል መሆኑን አንስተዋል።

ከዚህ ባለፈም የኢፌዴሪ የህዝብ ተወካዮች ምክር ቤት የልዑካን ቡድን ከተባበሩት ዓረብ ኤምሬቶች አቻቸው ጋር ባደረጉት ውይይት ሁለቱ ሀገራት በፓርላማዎቻቸው መካከል የሚደረግ ትብብርን ለማሳደግና የሁለትዮሽ ግንኙነታቸውን ለማጠናከር ተስማምተዋል።

የኢትዮጵያና የተባበሩት አረብ ኤምሬቶች ግንኙነት በሁሉም አቅጣጫ እየተሻሻለ እና የልማት ትብብሩም ከጊዜ ወደ ጊዜ ዕድገት እያሳየ ይገኛል።

በአገልግሎት ላይ ያለው የህዝብ ተወካዮች ምክር ቤት ህንፃ አባላት እንዲሰበሰቡ እኤአ በ1930ዎቹ የተሠራ መሆኑ ይታወሳል።

You might also like
Comments
Loading...